Shillong, Nialar 23
U Lamphang ka ïingdorbar thawaiñ ka Jylla, u Thomas A. Sangma, ha ka Sngi Thohdieng u la ong ba u dang ap ïa ka shithi ieh noh kam na u MLA ka Congress, uba dei ruh u nongïalam ka liang pyrshah, Bah Ronnie V. Lyngdoh naba ka seng jong u kam don shuh ïa ka jingbun paid hapoh ïingdorbar thawaiñ ka ban shah ïa u ban bteng ïa kane ka kam.
“Nga ngeit ba baroh ki tip ba u nongïalam ka liang pyrshah mynta u don tang marwei hapoh ïingdorbar thawaiñ. Kumta, ka ophis u Lamphang kan hap ban pynmih ïa ka jingthoh (denotification), ne ban ‘denotify’ ïa u,” ong u Sangma haba krsen sha ki lad pathai khubor ha ka sngi sdang jong ka Dorbar Synrai.
Haba kylli la kane ka kam kan leit sha ka TMC, u Lamphang u la ong, “Ngam pat lah ban ong naba ym don napdeng ki seng ka liang pyrshah kiba la phah jingthoh. Ngan shim ïa ka por – ban shim ïa ka rai bad khmih bniah bha shuwa ïa kane ka kam. Ngam lah ban shim rai khlem kano-kano ka jingpynsngew kaba wan shakhmat. Ïa mynta, ka jingdonkam ha ka jingbun paid kam don.”
Halor ka jingsynrop lang ka liang pyrshah, u Lamphang u la ong ba ïa mynta, kam don kaba kum kane.
Na ka liang u Lamphang, u la bynrap ba u dang ap ïa u nongïalam ka liang pyrshah ba mynta ban aiti ïa ka shiti ieh noh kam khnang ban ym donkam phah jingthoh shuh sha u.
Kumban shu kdew hangne, ka jingmih noh jong ki MLA ka Congress – Dr. Celestine Lyngdoh (Umsning), Bah Gabriel Wahlang (Nongstoiñ), bad Bah Charles Marngar (Mawhati) ban leit pynïasoh sha ka National People’s Party (NPP) ka la pynlong ïa ka seng (Congress) ban sah tang bad uwei u MLA, Bah Ronnie V. Lyngdoh, hapoh ïingdorbar.
