Mawkyrwat, Nailar:
U Myntri Khynnah jong ka Sorkar Pdeng uba dei peit ïa ka tnat Jal Shakti u Dr. Raj Bhushan Choudhary ha ryngkat u Bah Comingone Ymbon, Myntri ba dei peit ïa ka tnat Water Resource, ha ka Sngi Palei ki la leit jurip ïa ki projek bapher bapher ba la bei tyngka da ka Sorkar Pdeng ha South West Khasi Hills District.
Kine ki projek ki kynthup ïa ka Hydro Meteorological Station hapoh ka National Hydrology Project ha wah Umngi, ka projek pynlang um rit ha ka shnong Rangmaw, ka Miyawaki projek ha Pyndenspar, ka Amrit Sarovar Project Phase-II ha shnong Sakwang, bad ka projek MGNREGA Mawpon.
U Myntri Sorkar Pdeng u la leit jurip ruh ïa ka Flow Irrigation Project (FIP) ba la pyntreikam da ka tnat Water Resource ha Phot Umnew bad ha Mawten ïa ka Greater Mawkyrwat Water Supply Scheme bad ka Nonglang Water Supply Scheme.
U Myntri Khynnah ha kane ka jingjurip u la lap ba ka la don ka jingpyntreikam hok ïa ki skhim kumta u la kyntu ïa ki bor district ban pynthikna ba baroh kiba dei hok ban ïoh ïa ka jingmyntoi.
U Myntri hadien ka jingjurip ïa kine ki projek u la pynlong ïa ka jingïalang ha Circuit House Mawkyrwat bad ki heh jong ki tnat sorkar bapher bapher ban bishar bniah ïa ka jingpyntreikam ïa ki skhim.
Ki tnat sorkar ki kynthup ïa ka Community & Rural Development (DRDA), Integrated Child Development Scheme (ICDS), Public Health Engineering, Prime Ministers Employment Generation Programme (PMEGP), Public Works Department (Roads), Water Resources, tnat Soil and Water Conservation, Sarva Shiksha Abhiyan (SSA), tnat ka koit ka khiah, tnat ka rep ka riang, tnat Horticulture bad ka MePDCL kiba la ai ki jingkren kiba bniah halor ki jingjop bad ki jingeh ha ka jingpyntreikam ïa ki skhim.
U Dr Raj Bhushan haba kren sha ki lad pathai khubor u la pynpaw ba ka thong ba hakhmat eh jong ka Sorkar Pdeng ka long ban kyntiew ïa ka thaiñ Shatei Lam-Mihngi kumba long lem kiwei ki jylla.
“Ka la don ka jingpyrkhat kyrpang jong u Myntri Rangbahduh u Narendra Modi na ka bynta ka roi ka par jong ki jylla ka thaiñ Shatei Lam-Mihngi, bad kumta ki Myntri ka Sorkar Pdeng ki wan jngoh ïa ki jylla shatei lam-mihngi man la ka ar taïew ban pynthikna ba kan don ka jingpyntreikam kloi ïa ki skhim bapher bapher.
“Mynta ka sngi, nga la bishar bniah ïa ka jingpyntreikam ïa ki skhim jong ki tnat bapher bapher bad ki heh jong ka bor synshar district. Ka jingthmu ka long ban ïoh jingtip halor ka roi ka par ha kane ka jylla khnang ban ïanujor ïa ka Meghalaya bad kiwei pat ki jylla jong ka ri,” u la bynrap.
