Seoul, Nailar:
Ki bor pynïaid ka South Korea, ha ka Sngi Thohdieng ki la pyntip ba 7 ngut ki briew ki la duh ei noh ia ka jingim jongki hapdeng ka jingpluh jong kawei ka iing hotel kaba don hapoh katei ka ri, ha kaba ki don kumba 12 ngut kiwei pat kiba la ngat bad mynsaw lang ha katei ka jingjia.
Kane ka la jia ha ka miet Sngi Palei bad ka la sdang na kawei ka kamra jong ka mala ba pha (8) jong katei ka hotel hapoh Bucheon, kumba 25 Kilometre lane kumba 15 Mile na ka phang West jong ka nongbah Seoul.
Katba, ia ka daw jong katei ka jingpluh ym pat lah ban tip shai, hynrei la iathuh ba katei ka ding kaba klang ka la shim por haduh 3 kynta eiei ia ki kynhun pynlip ding ba kin lah ban tem ia katei ka ding kaba la klang jur ha katei ka iing mala.
Katei ka iing hotel ka don haduh 9 mala bad 64 tylli ki kamra. Hynrei, ha katei ka por ki don tang 27 ngut ki nongsah lane ki ‘guests’ kiba leit sah ha katei ka hotel.
Ki doktor ki iathuh ba ka jingiap ki briew ha katei ka jingjia ka long namar ka jingsniew jong katei ka tdem kaba rben bad kaba khlaiñ bha kaba mih na katei ka jingpluh bad kumta kitei kiba don hapoh ki la ioh ring mynsiem ia katei ka lyer bih kaba mih na katei ka jingpluh bad kane hi ka la pynlong bih bad ktah ia ka jinglong- jingman jong ka met jongki haduh ba kin da khlad noh syndon ha katei ka jingjia.
Kumjuh ruh ha u bnai Jylliew ba la leit, 23 ngut ki la khlad na kawei ka jingjia pluh ding ba shyrkhei bha ha kawei na ki shlem pynmih ‘battery’ jong ka South Korea, kaba long kawei na ki jingjia ba sniewbok bad ba shyrkhei tam ha katei ka ri bad ka bym ju kham jia koit mynta da ki phew snem.
