Jowai, Nailar 23
Ka Jylla ka la duh noh ïa u Bah Kynjaimon Amse, nongsaid aiñ bad u nongtrei kam bhalang hapoh ka imlang-sahlang. U la khlad kyndit ha ka jingjia aksiden kaba la jia harud surok ha Dkhiah, East Jaiñtia Hills District.
Katkum ka khubor, ka kali Maruti Swift kaba shong u Bah Kynjaimon Amse bad 3 ngut ki paralok ka la la leit ban tynrah ïa ka kynroh ha Dkhiah ha ka por kumba 2.00 baje mynstep jong ka 23 tarik Nailar.
Ha kane ka jingjia ki 3 ngut ki paralok ki la mynsaw jur bad la pynkit sha Civil Hospital, Khliehriat.
Lah ban pynkynmaw ba dang shen, shuwa ban jia kane ka ka jingjia kaba sngewsih, u Bah Amse ula ujor sha ka JHADC halor ka jingai No Objection Certificate ïa ka M/s Meghatop Cement Private Limited kaba don ha ka shnong Wahiajer Elaka Narpuh ban seng ïa ka ‘Cement Plant’ ha Elaka khlem ka jingmynjur na ka Dorbar Elaka Narpuh bad u la byrthen ruh ban mudui ïa ka JHADC sha iingbishar lada ym pyndam noh ïa ka NOC kane ka kompeni.
Ha ka sngi ba u sdang ïa ka kam said aiñ ha u snem 2017, u Bah Amse u la pynpaw ïa ka sur na ka bynta ki paidbah kiba sah ha Huroi, Hingaria bad kiwei-kiwei ki shnong ha shilynter ka Indo-Bangladesh namar ba ym don ka jingpynïasoh surok, ym don ki jaka sumar, ym don ‘mobile phone tower’ ne ym don ka jingpynbiang ‘mobile phone’ nalor kiwei-kiwei kam pynroi.
U Bah Amse u la mudui da ka PIL ïa ka Union of India bad ïa ka National Highway Authority of India sha ka ïingbishar jong ka Jylla (Meghalaya High Court) namar ka jinglong-jingman ka surok kaba sniew tasam kaba dap da ki thliew ki syar bad ki jingkieng ba synjor na Lumshnong sha Ratacherra kaba hap hapoh ka National Highway 6 ha shilynter jong ka East Jaiñtia Hills District.
Ïa u Bah Amse la kha ha ka 20 tarik Nailar 1994 na ka shnong Umkiang kaba hap hapoh ka Lumshnong C&RD Block, East Jaiñtia Hills District bad haduh ba un da khlad noh, u bat kum u Assistant Waheh Shnong ka Dorbar Shnong Umkiang.
U Bah Kynjaimon u la pyndep ïa ka jingpule Law na ka Rajiv Gandhi National University of Law (RGNUL) ha Patiala, Punjab hadien ba u la pyndep ïa ka jingpule jong u na ka St. Edmund’s College, Higher Secondary Section.
Ka jingleit on tep ïa ka met kaba sah jong u kan long ha ka 25 tarik Nailar, ha u Lum jingtep ka Balang Katholik Umkiang, ha ka por 1:00 baje nohphai sngi.
