Shillong Nailar 23
Ka Ïingdorbar Thawaiñ ka Jylla ka la kynmaw burom ïa u Myntri Rangbah barim u Salseng C Marak uba la khlad noh ha ka 16 tarik Nailar, 2024 ha ka rta kaba 83 snem.
U Salseng u la mihkhmat nyngkong kum u MLA ka Resubelpara naduh ka ilekshon MLA kaba nyngkong eh ka Jylla ha u snem 1972 bad u la long u nongïalam ba paw ka Congress bad jong ka Jylla.
U Symbud Myntri Rangbah u Bah Prestone Tynsong uba ïeng ban ai jingkren ha Ïingdorbar ha ka sngi ba sdang ka Dorbar Synrai namar u khlem don u Myntri Rangbah, u la kynmaw burom ïa u Salseng kum u nongïalam uba lehrit bad uba la poi sha ka kyrdan Myntri Rangbah ka Jylla namar ka jingshaniah bad jingïajan kaba don ha u.
Nalor u Bah Prestone la ïashimbynta lang ruh u nongïalam ka Liang Pyrshah u Bah Ronnie V Lyngdoh, u Dr Mukul Sangma kiba la pyrto ïa u Salseng kum u nongïalam paidbah uba jai jai bad sngewrit bad uba la noh synñiang shikatdei eh ha kiba bun ki liang ban kyntiew ïa ka Jylla.
La kynmaw burom ruh ïa u MLA barim ka Mawthengkut u Bah Raisen Mawsor nalor kiwei pat ki nongmihkhmat paidbah kiba la khlad noh ha kine ki khyndiat bnai.
