Shillong, Nailar 23
U Symbud Chief Exe-cutive Member (CEM) ka KHADC bah Pynshngaiñ N. Syiem ha ka Sngi Thohdieng u la ïathuh ba na ki 29 tylli ki konstitwensi ha ka ilekshon MDC, kaba heh duh ka jingdon ki nongthep ‘vote’ ka dei ka Mawlai kaba don kumba 50,000 ngut hadien ba la rah noh ïa ka Mawpat sha ka Mawkhar-Pynthorum -khrah konstitwensi.
Haba ïakren bad ki nongthoh khubor hadien ba la dep mynjur ïa ka Khasi Hills Autonomous District Council Constitution of District Council (Amendment) Rules, 2024 ha dorbar ka KHADC mynta ka sngi, u Bah Pynshngaiñ u la ong ba ka jingbun ki nongthep ‘vote’ ha Mawlai ka dei namar ba ki shnong kim treh ban leit ïasoh bad kiwei ki konstitwensi.
U la ïathuh ba ki shnong kiba bun ki nongthep vote kum ka Nongstoiñ konstitwensi mynta ka jingdon ki nongthep vote ka la ïaryngkat bad ka ilekshon MLA.
U la pyntip ba ki konstitwensi kiba don hapdeng ka sor Shillong kum ka Laban Mawprem kiba duna ki nongthep ‘vote’ mynta la pynhap shuh shuh sa kiwei ki shnong na kiwei ki konstitwensi katba ka Mawkhar-Pynthorumkhrah konstitwensi ka la kham bun ki nongthep vote.
Ka Dorbar kyrpang kaba la pynlong mynta ka sngi tang ban mynjur ïa ka jingpynbeit ryntih ïa ki konstitwensi ka la neh tang hapoh 20 minit, bad ïa katei ka aiñ rew (Bill), ka shlem treikam u Lamphang ka District Council, ka la phah mynta ka sngi hi sha ka sorkar jylla ban ïoh ïa ka jingmynjur na u Lat. U Bah Pynshngaiñ u la ïathuh ba ka por ban pynjlan ïa ka samoi treikam ki MDC kan kut ha ka 5 tarik Nailur mynta u snem bad ka shong ha ka sorkar ba kan rai la kan pynlong ilekshon ne kan bteng biang ban pynjlan ïa ka ilekshon.
