Washington, Nailar:
Katkum ki khubor, la ong ba katto- katne ngut ki jaitbynriew nong Hindu kiba sah hapoh United Statse, ki la mih shakhmat ban thaw ia ka kynhun ‘Hindus for Kamala Harris’, kaba long ka kynhun ban ai jingkyrshan ia katei ka nongmihkhmat jong ka Democratic ka ban iakhun ia ka shuki President pyrshah ia u Trump bad kitei ki nong India ki la ong ba lada ka Kamala Harris kan jop ia katei ka shuki nongialam ha kane ka sien, kan long ruh ka jingmyntoi ia ka India, ia ka United States bad kumjuh ruh ia ka pyrthei baroh kawei.
Kumta, la ong ba katei ka kynhun jong ki nong India kiba shong- sah hapoh US, ka la ai jingkyrshan kyrpang ia ka Kamala Devi Harris ban long ka President ba 47 jong ka United States of America ha kane ka sien.
La ong ba ha katei ka Sngi Palei, ka Harris, 59 snem ka rta, ka la pyntikna ba ka la pdiang ia ka jingtyrwa ban long ka nongmihkhmat bad ka kyrtong na ka Democratic Party.
Kumta, kitei ki nong US bad ki nong India kiba don hapoh US, ki la mih hakhmat ban pynpaw ia kawei ka sur bad kata ka long ban ailad ia ka Harris ban long ka nongialam jong ka ri US ha kane ka sien, naka bynta ka jingbha lang jong ka pyrthei baroh kawei.
