Shillong, Nailar 23
Ka lympung ïalehkai Meghalaya Youth League 2024 na ka bynta ka kyrdan ïalehkai U-14 bad U-16 ba la pynïaid da ka Meghalaya Football Association ka la nangjam shaphrang ha kaba haduh 13 tylli ki jingïalehkai jong ka wat kaba hynriew kin bteng ha ka sngi Saitjaiñ.
Ha ka Zone-A yn sakhi ïa ka jingïalehkai kaba khatduh jong ki khynnah shynrang U-14 namar ba kane ka group ka don tang lai tylli ki kynhun kiba ïashim bynta. Ka North Garo Hills District Sports Association bad ka Tura District Football Association ki la ïoh ban khur mar 7 bad 6 point bad kin sa ïa kynduh ban rai mano ban ïoh ïa ka kyrdan ba hakhlieh duh.
Ka kynhun kaba bat ïa ka kyrdan ba hakhmat eh jong ka Zone-B ka West Jaiñtia District Sports Association kan ym don jingïakhun ha ka sngi Saitjaiñ, hynrei kiwei pat ki kynhun kin hap ban ïakhun kiba kynthup ïa ka Amlarem Block Sports Association bad ka Laskein Block Sports Association, kiba wan ha ka kyrdan kaba ar bad kaba lai ha ka 2019 ha ka U-14.
Kan don tang kawei ka jingïalehkai ha ka Zone-C, hapdeng ka Riwar Mihngi Football Association pyrshah ïa ka Western Ri-Bhoi Sports Association ha ka U-16. Ka kynhun ka ban khur ïa ka jingjop kan wan ha ka kyrdan ba-ar.
Ha ka Zone-D yn ïohi ia baroh hynriew tylli ki kynhun kiba ïashim bynta ha baroh ar tylli ki kyrdan rta. Ka Nongstoiñ District Sports Association kaba la lamkhmat ha baroh ar tylli ki kyrdan, ka dangïoh ka por ban pynkhreh sa shi taïew.
