Shillong, Nailar 23
Ka Lamlynti SC ka la khur ïa ka jingjop ha ka lympung ïalehkai Third Division Football League 2024 ba la pynïaid da ka Shillong Sports Association (SSA) hadien ba la lah ban pynliem noh ïa ka Tynring SC da 2-1 kol ha ka sngi Thohdieng ha SSA Stadium kaba ha First Ground, Polo.
Kane ka nam jop ka la wan urlong lyngba u Khaiñkupar Iawphniang bad u Batskhem Thongnirit naka bynta ban khur ïa ki lai point.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang, hynrei tang ha ka minit kaba 9 ka Lamlynti ka la ïoh ban pynkhih jar lyngba u Khaiñkupar. Kane ka shi kol ka la nangpynïoh mynsiem ïa kane ka kynhun bad tang hadien shiteng kynta ka la pynbud biang ïa ka kol kaba ar lyngba u Batskhem ha ka minit kaba 37 na ka bynta ban tam da 2-0 kol ha ka kylla step.
Hadien ba la bteng ïa ka jingïakhun jong ka kylla miet ka Tynring ka la ïakhun tyngeh ha kaba ka la ïoh ban pynphai kylla shi kol lyngba u Tyngshaiñ Ryntong ha ka minit kaba 61. Haduh kaba kut kane ka kynhun kam shym la lah shuh ban pynphai bad ka la mad ïa ka jingshah rem.
Haba phai sha kawei pat ka jingïakhun kaba ar hapdeng ka Kharang SC bad ka Mawryngkneng SC ki la ïasam mar shi point hadien ba ki la ïakhaid mar 2-2 kol.
U Sanlangki Marbohha u la ïoh ban thep baroh ar kol na ka bynta ka Mawryngkneng ha ka minit kaba 34 & 90+1. Hynrei ka Kharang ka lah ban pynphai kylla lyngba u Justpal Kurbah ha ka minit kaba 65 bad u Willcome Pdahkasiej (75).
