Shillong, Nailar 23
Ka lahduh jong ka aïom ba la lah, ka Mohun Bagan Super Giant (MB-SG) ka la lah ban pynthikna biang sa shisien pat ban jam sha ka semi final ha ka lympung ïalehkai 133rd IndianOil Durand Cup hadien ba la lah ban pynliem noh ïa ka Punjab FC lyngba ka ‘sudden-death’ da 6-5 kol ha ka tie-breaker ha ka sngi Thohdieng ha Tata Steel Sports Complex kaba ha Jamshedpur.
Ha kane ka jingïakhun quarter final ka la long kaba itynnad bad kaba ïakhaid bha namar baroh ar ki kynhun ki la ïakhun tyngeh naduh kaba sdang, hynrei haduh kaba kut ki 90 minit kine ki kynhun ki la ïakhaid mar 3-3 kol.
Na ka Punjab la thep da u Luka lyngba ka penalty ha ka minit kaba 17, kumjuh u Mrzljak (63) bad u Vidal (71). Na ka liang ka Mohun Bagan ka la lah ban pynphai lyngba u Suhail Bhat (44), Manvir (48) bad u Cummings (79).
Watla la ailad ïa kine ki kynhun ba kin bteng biang ïa ka jingïakhun ha ka ‘extra time’ hynrei ym shym la don ba lah ban thep kol. Dei ha ka jingïashut tie-breaker ba katei ka kynhun ba khlaiñ bor na Kolkata ka la lah ban pynurlong ïa ka jingjop.
Haba phai sha kawei pat ka jing-iakhun quarter final kaba la long ha the Vivekananda Yuba Bharati Kri-rangan, Kolkata, ka Bengaluru FC ka la pynliem noh ïa ka Kerala Blasters FC da 1-0 kol bad ïa kane ka shi kol la thep da u Pereyra Diaz hashwa ban wai kata ha ka minit kab 90+5.
Te kumta ka Bengaluru kan ïakynduh pyrshah ïa ka Mohun Bagan ha kawei pat ka jingïakhun semi final.
