Nongpoh, Nailar 23
Ka Kick Boxing Association of Ri Bhoi District (KBARBD) kaba la pynïasoh bad ka Meghalaya Martial Arts Federation (MMAF), mynta ka sngi ka la ïoh ban sdang noh ïa ka lympung ïalehkai 10th District Level Ri Bhoi Kick Boxing Championship 2024 ka ban neh ar sngi lynter ha Niangbari Lum, Ri Bhoi District.
Ïa kane ka lympung la wan ban plie paidbah da u MDC jong ka Nongpoh konstitwensi, u Bah Balajied Rani ha ka jingïadon ryngkat jong u President ka MMAF, u Bah Thomas Rangthaluh, u Rangbah shnong ka Niangbari Lum, Bah Elfast Shadap lem bad kiwei kiwei de ki riew rangbah.
Ha kane ka lympung, ki don haduh kumba 63 ngut ki samla kynthei bad shynrang lem bad ki hep kiba rit ruh kumjuh kiba thep kyrteng ban wan ïashim bynta kum shi bynta ba kin ïoh ban sei ïa la ka sap ka phong na ka bynta ban shah jied pat ban ïoh ïalehkai sha ki kyrdan kiba kham shalor.
U Bah Thomas Rangthaluh haba kren ha kane ka sngi, u la pynpaw ïa ka jingsngewbynñiaw halor ka jingbymbiang jong ka jaka ïalehkai bad ki tiar ïalehkai, wat lada kane ka dei ka lympung ïalehkai kaba shiphew sien kynthih kaba la pynlong hapoh ka District.
Halor kane ki jingduna kiba bun kiba ïadei bad kane ka jait jingïalehkai, u Bah Thomas Rangthaluh, u la buh ïa ka jingkyrpad sha ki bor sorkar bad ki nongmihkhmat ba kin shimkhia bad phai khmat lem sha kane ka jaid jingïalehkai ban kyntiew ïa ki khun samla jong ka District bad ka jylla hi baroh kawei.
