Shillong, Nailar:
Ka Employees’ State Insurance Corporation (ESIC) ka la pynlong ïa ka jingpynsngewthuh paidbah ha nongbah Shillong ha kaba u Gautam Kumar, Deputy Director Regional Office jong ka thaiñ Ahmedabad kumba la jied da ka shlem treikam jong ka ESIC, u la batai shaphang ki jingmyntoi ba bun jait ba la ai da ka ESIC bad ki jubab jong ki nongtrei ka ESIC bad ki nongmihkhmat jong ki karkhana. Ha kane ka sngi la ïashim bynta da ki 108 ngut ki nongtrei bad ki nongmihkhmat jong ki nongpyntreikam. Ha kane ka jingïalang la ïoh ruh ïa ka jingkren na u Administrative Medical Officer ka ESIS jong ka Sorkar Jylla Meghalaya, Dr. E.D Suchiang Challam, u Sebabrata Das, Manager bad Social Security Officer jong ka Ophis ka tnad Shillong u la pynïaid ïa kane ka prokram ha kane ka sngi.
Ha ka sngi kaba bud, u Gautam Kumar u la ïakynduh ïa u Challienkhum Songate, IRS ban pyntip sha u halor ka jinglong jingman jong ki mat bapher bapher kiba dang ap bad ka Sorkar Jylla bad kumjuh ruh ka ESIC na ka bynta ban pyntreikam ïa ka ESIC Act ha ka Jylla. Na ka liang u Songate u la kular ruh ban ai ïa ka jingkyrshan kaba donkam na ka Sorkar Jylla ban pynsted ïa kane ka kam.
Ka ESIC kumba la bthah da ka aiñ Employees State Insurance Act, 1948 kaba dei kaba ai ïa ki jingmyntoi kiba bun jait kiba ïada ïa ki nongtrei na ka jingktah jong ki jingjia kiba pang, ka jingkha khun, ka jingduna ha ki dkhot met bad ka jingïap namar ka jingmynsaw ha ka kam bad ban ai jingsumar ïa ki briew kiba la ïoh insurance bad ïa ki longïing-longsem jong ki.
Shuh shuh ka ai ruh ïa ka bhah ïa ki khun jong ki Insured Persons (IPs) na ka bynta ban rung ha ki 8 tylli ki Medical College, 1 Nursing College bad kawei ka Paramedical College. Ka skhim ESI ka treikam na ka bynta ki karkhana bad kiwei kiwei ki jaka treikam ha kaba 10 ngut ne palat ki briew ki shah thung kam bad ki nongtrei jong ki jait karkhana bad ki jaka treikam ba la kdew haneng, kiba shim tulop haduh T. 21,000/- shi bnai, ki don hok ban ïoh ïa ka jingïada ha ka imlang sahlang katkum ka aiñ jong ka ESI.
Na ka liang u Director General, ka ESIC u la leit jngoh ïa kane ka thain ha u bnai ba la dep bad u la bthah ïa ki ophisar ba kin pynsted ïa ka jingpynpoi ïa kane ka skhim sha ki district kiba dang sah jong ka thaiñ namar ki nongtrei kiba donkam bad kiba duna ka tulop jong ka thaiñ ki la dep ap la jan 76 snem na ka bynta ka skhim Social Security ba kan poi sha ki. Kane ka jingleh jong ka ESIC ka la long tang ka sienjam ha kata ka liang da kaba pynleit jingmut ha ka thaiñ shatei lam mihngi, ka ESIC kan sa pynlong ïa ki jingpynsngewthuh kiba kum kine ha kiwei pat ki Jylla jong ka thaiñ shen.
