New Delhi, Nailar 25 (UNI)
U Myntri ka tnad kam pohïing ka Sorkar Pdeng, u Amit Shah ha ka Sngi U Blei u la ong ba ka jingkhaïi be-aiñ ïa ki jingdih pynbuaid ha India ka la ktah shi kat dei ïa ka jingshong shngaiñ jong ka ri bad ka donkam ban pynpra ïa baroh ki tnad treikam jong kiba don bynta ha katei ka kam lyngba ka sienjam, “Top to Bottom bad Bottom to Top”.
U Shah u la ong ba ka pisa kaba ïoh na ka jingkhaïi tuh ïa u drok ka kyntiew ïa ki kam pyntriem bad Left Wing Extremism (LWE), pyntlot ïa ka ïoh ka kot jong ka ri bad u drok ym tang ba u pynjot ïa ka pateng ban wan jong ka ri, hynrei u pyntroiñ ruh ïa ka jingshong shngaiñ jong ka ri.
U Myntri u la ong ïa katei hadien ka jingplie ïa ka Zonal Unit Office jong ka Narcotics Control Bureau (NCB) ha Raipur lyngba ki kor ka juk stad teknoliji. Ha kajuh ka por, u la lum ïa ka jingïalang khmih bniah halor ka jinglong-jingman ki kam khaïi jingdih pynbuaid ha Chhattisgarh.
Ha ka jingkren jong u, u Shah u la ong ba ka jingthmu ka Sorkar ban pyllait ïa ka India na u drok hapoh u snem 2047, mynta, ka la kylla long ka jingthmu jong man la ki nongshong shnong ka ri, ong ka kyrwoh.
U Shah u la ong, “Lymda ngi thom ïa baroh kawei ka tnad treikam, ngin ym lah ban kynjoh ïa ka thong jong ka India kaba lait na u drok – kaba donkam ha ka ban tei ïa ka India kaba riewspah, kaba shngaiñ bad kaba donnam.”
Haba kdew ba u drok um dei ka jingeh tang jong ka India, hynrei jong ka pyrthei baroh kawei, u la ban jur, “Lada ngi ïakhun ïa ka thma pyrshah u drok ha India da ka jingshit rhem, ka jingshimkhia bad ka buit kaba kynthup lang, ngin jop ïa kane ka jingïakhun.”
U Shah u la ong ba baroh ki dei ban ïa ïaid ryngkat lang haba ïadei bad ka mat treikam ka bym pdiang satia pyrshah ïa ki jingdih pynbuaid khnang ban pynurlong ïa ka jingthmu u Myntri Rangbahduh ka ri, u Modi, kata ka India kaba lait na u drok.
“Mynta ka sngi, ngi la plie ïa ka Raipur Zonal Office jong ka NCB. Kane ka ophis kan shim ïa ka bynta ba kongsan ha ka ban tehlakam ïa ki jingdih pynbuaid ym tang hapoh ka Jylla hynrei ha ka thaiñ baroh kawei. Ka thong jong ngi ka long ban don ka NCB ha man la ki Jylla jong ka ri. Ka Sorkar jong ngi kan pynkut ïa ki kam khaïi drok da kaba pynïeng ïa ki ophis NCB ha man ki Jylla da ka jingïatreilang jong ki Sorkar Jylla,” ong u Myntri ka tnad kam pohïing.
U la pynpaw ka jingsngewkhia halor ka jingkylla jong ki kam khaïi drok, kata na ka ‘natural’ sha ki drok ‘synthetic’, bad ban jur halor ka jingpyndonkam ïa ki rukom jong ka saian ha ka jingtohkit ïa ki mukotduma ba ïadei bad ka jingkhaïi drok.
U la ong ba ka long kaba donkam ban shim ïa ka sienjam “Top to Bottom and Bottom to Top” bad pynpra ïa baroh kawei ka tnad treikam.
Haba kdew ba u nongyndonkam drok u dei u lanot katba uba donkti ha ki jingkhaïi u dei u runar, u Shah u la bynrap, “Ngi lah ban jop ha kane ka jingïakhun tang lada bud ryntih ïa ki 4 tylli ki nongrim jong ka jingpynithuh ïa u drok, pynpra ïa ka tnad treikam, kem ïa kiba donkti bad ka jingïarap ïa kiba kyrni. Ngin ïoh ïa ka jingseisoh kaba pura tang lada kdup ïa ka sienjam ka Sorkar kaba kynthup lang ha ka jingïakhun pyrshah ïa u drok.”
