Nongstoiñ, Nailar 25
Ka ‘Meghalaya Minerals Land Owners, Lease Holders and Exporters Forum’ ka la pynpaw ïa ka jingsngewkmen bad sngewnguh ban tip ba ka sorkar jylla hapoh ka jingïalam u Myntri Rangbah u Conrad K. Sangma ba wat hadien ki jyrwit jyrwat ba ki nongkhaii dewïong bad ki nongbylla ki la mad na ka jingshah khang ban tih ïa u dewïong kaba la jia naduh u snem 2014 ha ka National Green Tribunal (NGT), hynrei na ka liang ka sorkar ka la trei shitom kumno ban sdang biang ïa ka jingtih ïa u dewïong lyngba ka juk stan saïan.
Ha u kyrwoh khubor, na ka liang u Bah Hammerles Roy Thabah, President, bad u Bah Sharailang Warjri, Secretary ka Forum, ki la ong ruh ba kane ka kynhun kaba kynthup ruh ïa ki trai jaka, ki Agent kur bad kiwei kiwei, hadien ka jingïohi ïa ka jingpynbna ka sorkar lyngba ka tnad ba dei peit ban khot ïa ka jingpynsngew paidbah lane ‘Public Hearing’ na ka bynta ka jingsdang biang ïa ka kam tih dewïong, ka la pynpaw ïa ka jingkyrshan ka bapura ïa katei ka jingthmu ba la pynbeit da ka sorkar .
Shuh shuh ki la ong ruh ba Forum ka khot bad ka kyntu ïa ki paidbah bad ïa ki para dkhot ba kin ai ka jingïasnoh kti lang ha kaba ïadei bad katei ka ‘Public Hearing’.
Ki la ong ruh ba ka Forum hi ka pynpaw ïa ka jingkyrmen ba lehse lyngba kane ka lad kan long ka jingkyrmen ïa ki paidbah nongshong shnong , ki nongbylla sngi hapoh ka thaiñ bad ka jylla hi baroh kawei kiba im bad pyndap ïa ka ïing ka sem lyngba ka jingïoh na u dewïong.
Lah ban kdew ba na ka bynta ban pynïaid noh shakhmat ïa ka kam tih dewïong kaba long katkum ka juk stad lane ka ‘Scientific Mining’, ha ka 27 tarik Nailar yn pynlong ïa ka ‘Public Hearing ha ‘Sdad Dkhar’, West Khasi Hills.
