Shillong, Nailar 25
Ki jingïalehkai jong ka lympung Meghalaya Youth League 2024 kiba la long ha ka sngi Saitjaiñ ha kylleng ki Zone ki la long kiba itynnad bad ruh ki la don ki jingkylla ha ka miej ïakheiñ point ha ki group bapher bapher.
Haba phai sha ki jing-ïalehkai ha ka Zone D, ka Pyndengumiong District Sports Association ka la ïoh bat biang ïa ka kyrdan ba nyngkong ha ka kyrdan U-14 hadien ba ka la jop da 2-0 kol ha ka jingïakhun pyrshah ïa ka Mawshynrut Sports Association. Katba ka Nongstoin District Sports Association pat ka la ïakhaid da mar 1-1 kol ha ka jingïalehkai pyrshah ïa ka Eastern Border Sports Association.
Kane ka jingïakhaid jong ka Nongstoin, ka la pynlong ïa ka Pyndengumiong kaba la khur 14 point ban kiew sha ka kyrdan ba nyngkong, hadien ba ka Nongstoin ka la ïoh 13 point. Ha kiwei pat ki jingïalehkai, ka Mawkyrwat District Sports Association ka la pynliem ïa ka Tyrsad Area Sports Association da 5-0 kol ban kiew ha ka kyrdan ba 3 da ka jingïoh khur 11 point.
Haba phai pat sha ka kyrdan U-16, ka Nongstoin ka la mad ïa ka nam rem kaba nyngkong ha kane ka kyrdan, hadien ba ka la shah pynliem noh ha ka Eastern Border da 4-1 kol. Watla ka la shah pynliem, hynrei hadien ba ka la dep ban kamai 13 point, ka dang bat hi ïa ka kyrdan ba nyngkong ha kane ka kyrdan. Ka Pyndengumiong ka la jop da 2-1 kol pyrshah ïa ka Mawshynrut katba ka Tyrsad pat ka la pynliem noh ïa ka Mawkyrwat da 1-0 kol.
Haba phai pat sha ka Zone C ha kaba la pynlong tang kawei ka jingïalehkai, kata ha ka kyrdan U-16, ka jingïalehkai hapdeng ka Riwar Mihngi Football Association pyrshah ïa ka Western Ri-Bhoi Sports Association ka la kut noh ha ka jingïakhaid da mar 2 kol.
Katba ha ka Zone-B pat ka Amlarem Block Sports Association ka la khur ka jingjop kaba heh, hadien ba ka la pynliem noh ïa ka Laskein Block Sports Association da 6-0 kol ha ka U-14 bad da 3-0 kol ha ka U-16. Kumjuh ruh ka Saipung Block Sports Association ka la jop da 1-0 kol ha ka kyrdan U-14 bad da 2-1 kol ha ka U-16 pyrshah ïa ka East Jaintia Hills District Football Association.
Haba phai pat sha ka Zone A, ka Tura District Football Association ka la pynliem noh ïa ka North Garo Hills da 4-0 kol ha ka U-14, ha kaba u Wanchiang K Marak u la ïoh ban khyrwit ka hat-trick bad ka North Garo Hills District Sports Association ka la pynliem noh ïa ka Tura da 2-0 kol ha ka kyrdan U-16.
