Shillong Nailar 25
Ka Jawaharlal Nehru Stadium ha Polo ka ngiam tang kumba 15 hajar ngut ki nongpeitkai hynrei ka jingbyrngem ki katto katne ki riewshimkabu ba kin leit rung jubor shapoh Stadium khlem tiket ban peitkai ïa ka jingïalehkai phutbol Durand Cup ka dei ka kam pynshit.
Ka jingïalehkai Semi-Final jong ka Durand Cup kan long hapdeng ka Shillong Lajong FC bad ka North East United FC ha Jawaharlal Nehru Stadium Polo ha ka Lah Sngi U Blei ha ka por 5.30 baje janmiet.
Kat ka jingïalehkai Semi-Final, ka dei hok ïa ki paidbah ban kwah leit peitkai ïa ka jingïakhun ha madan, hynrei ym lah ban pynbiang tiket lut kat ïa kiba kwah ban thied tiket namarba ki don tang kumba 15,000 hajar tylli ki jaka shong hapoh Stadium.
Wat ki jingïalehkai phutbol kum ka FIFA World Cup ne EURO Cup, ki Stadium kiba heh kiba ngiam da ki lak ngut ki nongpeitkai, kim lah satia ban die tiket na ka bynta ïa baroh kiba kwah leit peitkai da ki phew lak bad million ngut.
Ha ka jingdie tiket na ka bynta ka jingïalehkai Semi-Final, la sakhi ïa bun ngut ki paidbah kiba khlem ïoh tiket shuh namarba la dep ban die lut.
Ka jingdie tiket ka dei katkum ka jingheh ka Stadium bad ka jingdon ki jaka shong, ym lah ban leh palat.
Hynrei ka jingbyrngem ki katto katne ki riew shongshit ban pynthut bad leit rung beit sha Stadium khlem tiket ka dei ka jingkwah peitkai phutbol kaba ithamula wat haba ki la tip ba ka Stadium ka ngiam tang hapoh 15,000 hajar ngut.
Namar ha JN Stadium, Polo lah ban pynrung ïa ki paidbah tang katkum ka jingdon ki jaka shong, ki paidbah ki lah ruh ban peit ïa ka jingïalehkai Semi-Final ha Television (TV) lyngba ka Sony Sports Network bad SonyLiv nalor ka jingpyni Live lyngba ki LED Giant Screen ha ki katto katne ki jaka.
Wat hapdeng ka jingangnud kiba bun ban ïoh ïa ka tiket ban leit peitkai, ka long kaei kaei ka bym lah ban pdiang ban pynthut ïa ka jingïaid beit jong kane ka jingïalehkai phutbol kaba pawnam kaba dei kawei na ki jingïalehkai phutbol kaba la rim ha Dewbah Asia bad ruh ha ka pyrthei.
Ka jingïakhhun Semi-Final hapdeng ka Shillong Lajong FC bad North East United FC la khmih lynti ba kan ka jingïakhun kaba itynnad khamtam namar la tip kum ka jingïakhun ki Club kiba dei para North East lane ‘North East Derby’.
Ka Shillong Lajong FC ka dei ka Club kaba na Shillong, bad ka North East United FC ruh ka dei hi ka Club kaba na North East bad kaba don nongkyrshan ha kylleng ki jaka ha kane ka Thaiñ Shatei Lam Mihngi.
