Shillong, Nailar 25
U Ishak Ali Khan Panna, General Secret-ary barim ka Bangladesh Chhatra League (BCL) bad dkhot ka Pirojpur District Awami League (PDAL), u la khlad noh katba u dang pyrshang phet sha India, ong ka Dhaka Tribune.
Katei ka jingia ka la jia ha ka step Sngi Saitjaiñ ha Meghalaya, India, katkum ka tyllong khubor, la ong kawei na ki kotkhubor na Bang-ladesh, “The Dhaka Tri-bune”.
U pyrsa u Ishak Ali Khan Panna, u Laikuz-zaman Talukder Min-too, Chairman ka Chi-rapara Par Satoria Union Parishad bad Organizing Secretary ka Kaukhali Upazila Awami League, u la kam ba u Kñi jong u (Panna), u la khlad noh hadien ba u la btuid na u lum ha Shillong, Meghalaya, ha ka step Sngi Saitjaiñ, ha kawei ka liang kaba la ïalam sha ka jingsangeh tied jong u klongsnam.
U Jasim Uddin Khan, kynum jong u hymmen u Ishak Ali Khan Panna u la ong ba u la ïakren bad u Panna lyngba ka ‘phone’ 3 sngi hashuwa.
U la kdew ba u Panna u la wanphai sha Dhaka 2 sngi hadien ba u la sah ha ïing jong u, ha Shahid Fazlul Haque Road, ha Pirojpur ha ka 25 tarik Naitung.
U Jasim Uddin Khan u la ong ba ki la ïohsngew ba u Panna u la rung sha India lyngba ka khappud Tamabil ha Sylhet, ha kaba u la khlad noh.
Ka Dhaka Tribune ka la ong ruh ba ka tyllong khubor ka ïathuh ba ha ka por ba pyrshang phet u Panna, la synran lang ïa u da u nongïalam ka Central Committee jong ka Awami League, uba na ka thaiñ Chittagong, bad u nongïalam ka Jhalakathi Chhatra League.
U Ishak Ali Khan Panna u la shah jied kum u General Secretary ka Chhatra League ha ka Central Council jong u snem 1994.
Hadien ka Council jong u snem 2012, u la long u dkhot ka Central Sub-Committee jong ka Awami League bad hadien, u dkhot jong ki Sub-Committee bapher-bapher.
Haduh ba un da khlad noh, u la long u dkhot jong ka Pirojpur District Awami League.
Ha u snem 2008, u Panna u la ïoh pdiang ïa ka jingshah jied ha ka Awami League na Pirojpur-2 konstitwensi, hynrei u hap ban kynriah noh sharud namar ka ilekshon ïateh lok jong ka synrop ki 14 seng.
Haba phai sha ki kam jong u, u Ishak Ali Khan Panna u la long u Chairman jong ka Diamond Life Insurance Company Limited, ong ka Dhaka Tribune.
Haba pyrshang ban pan jingtip na ki pulit ka jylla halor katei ka jingjia, haduh ba thoh ïa kane ka khubor, ki pulit ki khlem lah ban ai ïa kano-kano ka jingkynthoh ne jingïathuh eiei.
Na ka liang ki shipai BSF Meghalaya Frontier ruh ki khlem pat ai ïa kano kano ka jingthoh ha kaba ïadei bad katei ka khubor.
Lah ban kdew ba ka Sheikh Hasina kaba dei ruh ka nongïalam ka seng Awami League ka la hap ban hiar na ka shuki Myntri Rangbahduh ka Bangladesh mynta u bnai hadien ba la mih ki jingïakhih kiba shyrkhei ha kylleng ka Ri. Hadien ba ka la hiar shuki, ka Hasina ka la wan phet noh sha India bad haduh mynta mynne ka dang don ha kane ka Ri. Hynrei ki don ki Myntri hapoh ka sorkar jong ka bad ki nongïalam jong ka Awami League kiba la shah kem naduh ka sngi ba ka la hiar shuki.
