Aizawl, Nailar:
Ka kam ri sniang jong ka jylla Mizoram kaba la ju long kaba roi bha mynta ka la mad ïa ka jingduhnong namar ka jingshah ktah kaba dang ïai bteng jong ka jingpang African Swine Fever (ASF) ha kane ka jylla.
Naduh ba ka jingpang ka la sdang ha u bnai Lber, 2021 une u khñiang jingpang u la wanrah ïa ka jingduhnong ha ka liang ka pisa tyngka kaba la kot sha ka 800 klur tyngka, kaba la pynlong ïa ki nongrep ban don ha ka jingduh jingkyrmen.
Ïa kine ki jingkheiñ kiba sngewkhia la pynpaw da u C. Lalsawivunga, u Myntri ba dei khmih jong ka tnat Animal Husbandry and Veterinary jong ka Mizoram ha ka jingïalang hapoh ïingdorbar kaba dang shen.
Katkum ka jingïathuh jong u myntri, ka jingwan jong ka khlam ASF ka la wanrah ïa ka jingïap jong ki sniang haduh 57,217 tylli.
Ka jingduhnong baroh kawei na kine ki kam bymman ka la kot sha ka 799.68 klur tyngka, kaba la buh ïa ki nongri sniang ha ka jingeh kaba khraw.
Ha baroh une u snem ka la don ka jingsangeh, na ka jingpang ASF. Naduh u bnai Kyllalyngkot haduh ka 15 tarik, Nailar une u khñiang jingpang u la pynduh noh ïa ki 9,866 tylli ki sniang, katba sa 17,977 tylli ki sniang la pynkynriah jaka na ka bynta ban ïada na ka jingsaphriang jong u.
Ka jingktah ha ka liang ka pisa tyngka na ka bynta u snem 2024 ka la kot sha ka `. 9.45 klur kaba pynpaw ïa ka jinglynshop jong ka ASF ïa ka kam ri jingri jong ka Mizoram.
Wat la ki ïoh jingkyrshan na ka sorkar ha ki por ba ki bor synshar jong ka Mizoram ki la ïaleh ban tehlakam ïa ka jingpang.
Kum ka jingkynthoh ïa ka jingpyrshang jong ka ASF ka sorkar jylla ka la pynbna ïa ka kum ka jingjia ba sngewsih ha ka 1 tarik Kyllalyngkot jong une u snem, kaba la pyni ïa ka jingtrei shitom kaba khraw jong ki.
Kum shi bynta ban tehlakam ïa ka jing-saphriang jong ka jingpang ka sorkar Mizoram ka la pyntreikam ïa ka jingpyntreikam pyrkhing, ha u bnai Jymmang halor ka jingwanrah ïa ki sniang bad ki doh sniang na ki jylla bad ki ri ba marjan.
Kane ka jingpyrkhing ka dang treikam katba ka jylla ka dang trei ban ïada ïa ki jingri-jingdup.
Namar ka jingkhang ban wanrah mar nabar ri kaba ktah ïa ka jingdon jong ka doh sniang ki seng shimet ki la sdang ban wanrah ïa ki mar na Pune, Maharashtra, ban pynhun ïa ka jingdawa jong ki jylla.
Wat hapdeng ka jinglong jingman ka jingbam doh sniang ha Mizoram ka dang khlaiñ bha ha kaba palat 4 lak kilo la bam man u bnai.
Ka kam ri sniang ha Mizoram ka mad ïa ka jingeh na ka jingpang African Swine Fever ka khlam kaba saphriang hapdeng ki sniang bad kaba buh jingma ha kaba ka shim ruh ïa ka jingim.
