Shillong, Nailar 25
Ka Sorkar Jylla lyngba u Myntri Rangbah, u Conrad K Sangma ka la kular hakhmat ka kynhun ki nongrep synsar bad nongïalam shnong ka thaiñ Mawkynrew hapoh ka jingïalam. u MLA Bah Banteidor Lyngdoh ban thaw lad thaw lynti ban kyntiew ïa ka dor u synsar bad pynkhreh ruh ban ai jingïarap ïa ki nongrep.
Kane ka jingkular ka la wan hadien ka jingleit ïakynduh ka kynhun hapoh ka jingïalam u MLA ka Mawkynrew ïa u Myntri Rangbah ha ïing sah jong u ha ka 22 tarik u Nailar, 2024. “U Myntri Rangbah u la kular ban ïakren bad ka Myntri kaba peit ïa ka tnat rep ka Sorkar Jylla kumjuh ïa ki ophisar kumno ban weng ïa kane ka jingeh,” la ïathuh u Bah Banteidor uba la ong ba ha ka jingiamir jingmut, u Myntri Rangbah u la pynsngew ba ka Sorkar ka la thaw lad thaw lynti ruh ban ïarap ïa ki nongrep.
Ka Sorkar ka don ruh ka jingthmu ban pynshlur ïa ki nongrep ban don ha ki kynhun ban long kum ki seng ïatreilang khnang ba kin lah ban pynwandur ïa u synsar uba dang shu kheit na lum sha ka rukom ban long uba la pynbit pynbiang lypa (finished products) lyngba ka jingïarap ka Sorkar.
Kane ka jingleit ïakren ïa u Myntri Rangbah ka dei na ka rai ba la shim na ka jingïalang kaba la long ha ka 01 tarik u Nailar, 2024 ha Thangsning kata hadien ka jingïoh pdiang ïa ka jingud jingnam na ki nongrep synsar ka thaiñ Mawkynrew halor ka jinghiar dor u synsar shaba palat, kata, na ka 130 tyngka shi kilo ha ki snem ba la dep, sha ka 30 tyngka shi kilo mynta, nalor ka jingshah ot kilo ha ki mahajon.
Ha katei ka jingïalang, ki nongrep kiba shaniah ha ka kam thung synsar ki la ong ba ka jinghiar ka dor ka la ktah ïa ka ioh ka kot jong ki haduh ba ki la shem jingeh ban pynleit skul ia la ki khun ki kti jong ki bad pynpaw ba ka dor die kam ïahap kam ia poi shuh bad ka bai pynlut ha kaba trei ba ktah bad sumar ia une mar rep khlaw.
Bunsien ki nongrep ki pynpoi ïa u synsar ha ka ïew khaïi synsar ha Mawïong, bad hangne pat nalor ba ka dor ka la rit lypa, ki mahajon ki ot kilo ïa u synsar bad phiah kyrdan No 1, No 2 bad No 3 ha la kajong kajong ka dor.
Ki la ong ba haba kylli ïa kitei ki mahajon balei ba ka dor ka hiar palat, ka jubab kaba ki nongrep ki ïoh ka long ba ka jingdawa synsar na shabar jylla kam don katba ka jingpynmih synsar ka bun bha bad kumta hap ban shu set kudam ïa u.
