New Delhi, Nailar:
U heh ka tnat shipai u General Upendra Dwivedi ha ka sngi Thohdiengi u la leit sha Manipur na ka bynta ban bishar bniah ïa ka jingshngaiñ jong kane ka jylla kaba la shah ktah jur ha ki jingjia ïakynad, la ïathuh ki heh sorkar kiba dei khmih halor kane ka bynta.
Kane ka dei ka jingleit ha ka sien kaba nyngkong jong u Dwivedi sha kane ka jylla hadien ba ka la shimti ïa ka kam kum u heh shipai na u General Manoj Pande ha ka 30 tarik, Jylliew.
Ka jingleit jngoh jong u Dwivedi ka long ban bishar bniah ïa ka jinglong ba la pynkhreh jong ki shipai, la ong ki heh sorkar.
Kumba la ïathuh da ki bor ba dei khmih u la leit phai sha Delhi ha ka sngi Saitjaiñ.
Ha kane ka jingleit jngoh jong u, une u heh shipai u la ïakynduh ïa u Myntri Rangbah ka jylla u N Biren Singh ha ïingsah jong u ha Imphal.
Hadien kane ka jingïakynduh, u Singh u la buh jingthoh ha ka rynsan X, da kaba ong,
“Ka la don ka jingïakynduh kaba seisoh bad u General Upendra Dwivedi, u heh shipai, ryngkat bad u Lieutenant General u RC Tiwari, u General Officer Commanding-in-chief, Lieutenant General Abhijit S Pendharkar, General Officer Commanding . 3 Corps, bad u Major General Ravroop Singh, Inspector General Assam Rifles (South) ha Secretariat jong nga.”
“Nga sngewnguh shibun eh ïa ka jingleit jong u General Dwivedi sha Manipur. Ngi la ïakren ïa ki mat kiba kongsan kiba ïadei bad ka jinglong jingman mynta ha ka jylla jong ngi. Ngi la pynskhem biang ïa ka jingïatreilang hapdeng ka sorkar jylla bad ki bor pahara ha kaba jubab hok ïa ki jingeh kiba ngi ïakynduh, ban pynneh ïa ka shongsuk-shongsaiñ ha ka jylla,” u la thoh shuh shuh.
Naduh u bnai Jymmang, 2023, ka Manipur ka la shah pynkhih ha ki jingïakynad jaitbynriew hapdeng ki jaitbynriew Meitei kiba bun bad ki jaitbynriew Kuki, ha kaba kiwei pat ki jaitbynriew ki la don bynta ha ka jingïakynad kaba la bteng khlem sangeh.
Ha kine ki 10 bnai ba la dep, ym duna ïa ka 220 ngut ki briew, kynthup ïa ki bor pahara, ki la duh ei ïala kajong ka jingim, bad palat 50,000 ngut ki briew ki la duh ïa ki jaka shong jaka sah.
Ki jingïapher jingmut ki dang don bad namar kane ka daw ym shah ïa ki briew na kawei ka jaitbynriew ban rung sha ka jaka ba kiba na kawei pat ka jaitbynriew ki don ha ka jingbun paid.
Wat hapdeng ka jingpynbna kaba jur jong ki bor pahara pdeng bad ki shipai, hynrei ka jingïakynad kaba ju jia man ka por ka dang ïai bteng, namar ba la lute haduh 4,000 tylli ki tiar ïaleh na ki jaka buh tiar jong ki pulit ka jylla ha kaba kine ki dang don ha ki kti jong ki riew paidbah.
