Shillong, Nailar 25
Ki nongpynïaid ka jaka theh umphniang kaba ha Umran, Ñiangbyrnai, Ri-Bhoi ki la ujor ejahar halor ka jingshah tuh pisa kaba palat T.4 lak ha ki 4 ngut ki runar ki bym ithuh satia ha ka step Sngi U Blei.
“Nga thoh kane ka shithi ban pyntip sha phi halor ka jingjia shah shoh bad shah lute ha ka jaka theh umphniang jong ngi ha ka step Sngi U Blei ha ka por 5:15 baje eiei,” ong u Manager ka Umran Fuels (Indian Oil Petroleum Pump) kaba ha Umran, Ñiangbyrnai, Ri-Bhoi, u Sanjay Sharma ha ka ejahar sha u OC ka thanad Umsning, Ri-Bhoi.
U Sharma u la ïathuh ba haba u la plie ïa ka jingkhang jong ka jaka sah ki nongtrei ha ka por mynstep ban sdang ïa ka jingtreikam, 4 ngut ki briew kiba la rieh lypa shabar la katto-katne por ha ka por mynstep, ki la ap ban plie ïa ka jingkhang bad mat kumta hi kynsan-kynsan ki la tur sha u Sharma ha ryngkat ka tari bad ot ïa ka kti jong u.
“Hadien kane, ki teh ïa ki kti ki kjat jong nga lem bad uwei pat u nongtrei jong ka jaka theh umphniang bad kura bad kynjat ïa ngi baroh ba kynthup ïa u nongshet. Hadien kane, ki la shim ïa ki shabi ‘Locker’ na pla patlun jong nga bad rong lut ïa baroh ka pisa napoh ka ‘Locker’ kaba don kumba T.4,24,614,” ong u Manager.
U la ong ba kitei ki runar ki la knieh noh ruh ïa 3 tylli ki ‘mobile phone’ jong ki bad phet krad na katei ka jaka ha ryngkat ka pisa lem bad ki ‘mobile phone’.
“Mar syn phet ma ki, u nongshet u la ïarap law ïa u tyllai ba la teh ïa ngi bad mar-mar ngi la pyntip halor kaei kaba la jia sha u Sr. Manager, u Manish Jain, uba shong ba sah ha Shillong,” u la ong.
Shuh shuh u Sharma u la aiti lang ïa ki durkhih CCTV jong ka jaka theh umphniang kaba pyni ïa ki kitei ki 4 ngut ha ka por ba ki rung bad mih na katei ka jaka. “Hynrei namar ka jingbym don ‘Camera’ hapoh jaka sah ki nongtrei, ym shym la lah ban ring dur lut ïa baroh kaei kaba la jia.Ngi kyrpad ïa phi kumta ban ujor ejahar pyrshah ïa kitei ki 4ngut ki runar ki bym ithuh satia bad ban kem noh kloi ïa ki kumjuh ban wad ïa ka pisa ba shah tuh bad ki ‘mobile phone’,” ong ka ejahar na u Sharma.
