Shillong, Nailar 25
Ka Meghalaya ka la ïoh rung sha ka semi-final jong ka lympung U-15 Boys’ Subroto Cup 2024 hadien ba ka la lah ban pynliem noh ïa ki khynnah ka Army Boys Company da 2-0 kol ha ka quarter-final kaba la long ha ka sngi U Blei ha Bangalore.
Haba phai sha ka jingïalehkai, ïa ki kol jong ka Meghalaya la ïoh ban thep da u Nangsanbha Warjri bad u Chanjib Chetry. Kumba long mynta, u Chanjib Chetry ha kane ka lympung u la ïoh ban khyrwit haduh 11 tylli ki kol.
Ïa ka Meghalaya ha ka kyrdan U-15 Boys’ la mihkhmat da ka Nongjri Presbyterian Secondary School kaba na Ri-Bhoi, ka skul kaba la jop bad rah ïa ka nam lahduh jong ka State Level Subroto Cup ha u bnai ba la dep.
Hadien kane ka jingjop, mynta na ka liang jong ka Meghalaya kan pynkhreh ban ïakhun pyrshah ïa ka Bangladesh Krika Shikkha Protishan kaba na Bangladesh, ka ban sa long lashai ka sngi ka 26 tarik ha ka por 3 baje janmiet.
Haba phai sha ki jingïalehkai jong ka Group-B, ka Meghalaya ka la jop baroh ki jingïalehkai, kata da ka jingjop da 6-0 kol ïa ka Sri Lanka, ban jop da 7-0 kol ïa ka ISSO bad da 8-0 kol pyrshah ïa ka Dadra & Nagar Haveli and Daman & Diu. Ha kine ki lai tylli ki jingïalehkai, u Chanjib u la ïoh ban khyrwit hat-trick.
Sa kawei pat ka kynhun kaba don lang ha kane ka group, kata ka Madhya Pradesh, ka dei kaba la shah disqualified ne shah beh noh.
