Shillong, Nailar 25
Ki nongkitkam bapher bapher jong ka seng National People’s Party (NPP) ki la rai ban neh beit ha ka seng wat lada ki lai ngut ki MLA ka Congress ki la rung sha ka NPP.
Kine ki lai ngut ki MLA Congress kiba dang shu rung sha ka seng NPP ki long u Bah Charles Marngar na Mawhati konstitwensi, u Bah Gabriel Wahlang na Nongstoiñ bad u Dr. Celestine Lyngdoh na Umsning konstitwensi.
Kumban shu pynkynmaw ha ka sngi ba kine ki lai ngut ki MLA Cong-ress kin rung sha ka seng NPP, ki ar ngut ki MLA barim ka NPP kata u Bah Jason Mawlong na Um-sning bad u Bah Mac-milan Byrsat na Nong-stoiñ bad u kyrtong ka NPP na Mawhati, u Bah Shemphang Lyng-doh ki la leit ïakynduh kyrpang ïa u Bah Prestone Tyn-song uba dei u President ka NPP Meghalaya hynrei ynda la mih na ka jingïalang kim shym la treh ban ai jingkren.
Ki khubor ki ïathuh ba kine ki lai ngut ki kwah ban pynsangeh ïa ka jingrung NPP ki MLA Congress namar ki tieng ïoh ki shah leh kiar haba la wan ki MLA ka Congress. Hynrei ki nongïalam ka NPP kim shym la sngap namar ki donkam ban skhem ka sorkar NPP ha kine ki saw snem ban sa wan.
Haduh mynta kine ki lai ngut ki kyrtong NPP na ki lai tylli ki konstitwensi kiba la shah rem kim treh ban kren ne pynshai sha ki lad pathai khubor la ki hun ne kim sngewhun ïa ka jingrung ki MLA Congress khnang ba ki nongkyrshan kin tip namar kane ka la pynsah umdum ïa ki nongkyrshan haba ka ilekshon MDC ka la jan.
Ka jingsah umdum ki nongkyrshan ka long namar shisien ba la rung ki MLA Congress sha ka NPP wat ïa ka tiket MDC na kitei ki lai tylli ki konstitwensi ka lah ban leit beit sha ki nongkitkam kiba hakhmat jong ki MLA Congress.
Haba ïoh ban ïakren bad ki katto katne ki nongkitkam jong ka NPP kiba dei ki kyrtong kiba shah rem ki la ong ba kin neh beit ha ka seng NPP, hynrei kim lah ban batai ïa ka por ban san wan.
Ki la pynpaw ba haduh mynta kine ki kyrtong kiba shah rem ha ka ilekshon MLA ruh kim pat ong eiei hynrei ki kyrmen ba kin pdiang beit ïa kine ki lai ngut ki MLA Congress kiba la rung sha ka NPP.
Ha kajuh ka por ki la kyrpad ïa ki nongkitkam ka NPP ba kim dei ban lehkiar ne lehbeiñ ïa ki haba la wan ki MLA Congress.
Ki khubor kiba la ïohlum ki ïathuh ba ka Kong Macdalyne Mawlong kaba dei ka MDC ba mynta na ka NPP na Umsning konstitwensi ka lah ban ym ïoh tiket shuh ha ka ilekshon MDC na Umsning hynrei lah ban ïoh da ki nongkitkam kiba hakhmat jong u Dr. Celestine Lyngdoh.
Ym tang ka Kong Macdalyne, hynrei wat ki nongkitkam NPP kiba la pynkhreh bha na Nongstoiñ bad Mawhati ki lah ban ym ïoh tiket namar ka NPP kan ai tiket beit ïa ki nongkitkam haba la wan pynïasoh da ki MLA.
