Shillong, Nailar 25
Ka tnad ki kam ïalehkai ka Sorkar Jylla ka la pynïeng ïa 9 tylli ki ‘Fan Park’ ha kylleng ki jaka khnang ba ki ‘riewieid phutbol kiba khlem ïoh shuh ïa ki tiket ki lah ban sakhi ïa ka kylla ‘Semi-Final’ jong ka lympung ïalehkai phutbol ‘Durand Cup’ hapdeng ka Shillong Lajong FC bad ka North East United FC ka ban long ha ka 26 tarik Nailar.
Haba phai sha ki jingsngewkhia ki paidbah halor ka jingdie ïa ki tiket bad ka jingkhmih ïa u paidbah na bynta ka kylla ‘Semi-Final’ jong ka lympung ïalehkai phutbol ‘Durand Cup’ hapdeng ka Shillong Lajong FC bad ka North East United FC, ka tnad ki kam ïalehkai ka Sorkar Jylla ha ka Sngi U Blei ka la pyllait ïa ka kyrwoh haba ïadei bad kane ka bynta.
Ka J.N. Stadium, ka madan ïalehkai ba ju pyndonkam na ki bynta ki jingïalehkai bapher-bapher, ka don ïa ki jaka shong paidbah kumba 15,000 tylli.
Kum shi bynta ban khmih ïa ka jingshngaiñ, ki kyndon ba ïadei bad ki kyrdan ïalehkai phutbol ka ri, bad ka kular sha ki nongsynñiang kiba pynlong ïa kum kine ki jingïalekai kiba jop – ïa ki 4 tylli ki laiñ jaka shong naba sdang (first 4 rows) jong ka ‘North’/’South Stand’ bad ki 2 tylli ki laiñ jaka shong naba sdang (first 2 rows) jong ka ‘East Stand’ ym shym la die tiket na bynta kine.
Ka kyrwoh ka ong ruh ba ïa kine ki jaka shong la buh khnang da kaba buh jingmut ïa ka jinglong-jingman na bynta ki jingïalehkai ‘Athletics’, ha kaba kine ki jaka shong kin long kiba paka tam haba phai sha ka jingïohi.
Kumta, ka tnad ka la ïaid shakhmat bad baroh ki jingpynbiang ban pyntikna ba bun ngut ki ‘riew-ieid phutbol kin ïoh pdiang ïa ki tiket, wat hapdeng ka jingdawa kaba jur haba nujor bad ka jingdon jong ki jaka shong.
Na ka jingdon jong baroh ki jaka shong, khyndiat tylli ki tiket kumba la mynjur da ka Durand Cup Organising Committee (DCOC) bad la pynbiang sha ka Sorkar kum ki ‘Complimentary’ tiket ban pynurlong ïa ki jingdonkam ki nongsynñiang bad ki jingdonkam ka komiti ba pynïaid, ha kaba ki 2 tylli ki kynhun ïashim bynta – Shillong Lajong FC bad ka NEUFC ki la ïoh pdiang 100 tylli ki tiket katkum ki kyndon.
Ka Sorkar ka pynpaw ruh ka jingsngewnguh ïa ka jingwan shakhmat jong kiba bun bah ban thied tiket bad baroh ki tiket mynta la dep die lut.
Ka kyrwoh na ka tnad ka ong ruh ba ki ‘riewieid phutbol ki dei ban buh jingmut ba la khang pyrshah ban die biang ïa ki tiket, bad la kyrpad ba lada don kiba kum kine, dei ban pyntip sha ka tnad pulit ka Jylla.
“Baroh ki tiket ki don ïa ki ‘hologram’ ha ki, ban pyntikna ba tang kito kiba dei hok ki trai tiket yn shah rung sha Madan. Kiba thied ‘Online’ ki dei ban leit shim ïa ki tiket na ‘Box Office’ ha U Soso Tham Auditorium ha ka 25 tarik Nailar hapoh ka 6 baje,” ong ka kyrwoh.
Ha kajuh ka por, la bthah ba kito kiba khlem tiket, yn ym shah ha ki sawdong-sawkun jong ka Madan ha ka 26 tarik Nailar hadien ka 12 baje mynsngi.
Kumta ban khmih bniah ïa ka jingduna jong ki jaka shong ha J.N. Stadium bad ban pynbun ïa ki nongpeitkai, la pynïeng ïa ki ‘Fan Park’ ha kylleng ka nongbah bad ki distrik bapher-bapher.
Na ka liang ka tnad ka la kyrpad ïa ki ‘riew ieid phutbol ban leit mih sha kitei ki ‘Fan Park’ kumjuh ban kyrshan ïa ki kynhun jong ki lada jia ba ki khlem thied tiket.
Ki jaka ban pynïeng ïa ki ‘Fan Park’ kin kynthup ïa ka – Malki Sports Ground (Malki), Madan Saw (Golf Links), Madan-Heh Ground (Mawlai), Police Point Parking Lot (Laitumkhrah), Umpling (Mawarliang), Madan Daimasi, Ladthalaboh (Jowai), Pahamsyiem Ground (Nongpoh), Patharkhmah Hr. Sec. School (Patharkhmah) bad Nongstoiñ Playground (Nongstoiñ).
Nalor kane, yn pyni ruh ïa ka jingïalehkai ha ki ‘Large Screen’ ka DIPR ha Police Bazaar bad PHC, Rynjah.
Shuh shuh ka Sorkar Jylla ka buh hakhmat ïa ka jingshngaiñ jong ki nongpeitkai bad ka jingïaid beit ïaid ryntih jong ka jingïalehkai bad kyrpad ïa ki nongshong shnong ka Shillong ban bud ryntih ïa ki jingbthah ba la buh.
