Shillong, Nailar 25
Ka Meghalaya Boxing Association (MBA) ka la pynkup burom ïa ki ar ngut ki coach lem bad ka ‘thei ïakura kata ka Priyanka Thapa kaba la khur ïa ka takma rnong dang shen ha ka Sub Junior Boys & Girls National Boxing Cham-pionships 2024.
Ïa kane ka jingpynkup burom la pynlong ha ka sngi Saitjaiñ ha Shillong Press Club ha kaba la ïadon lang u President u Bah Cornelius Kharhunai, kumjuh u Treasurer Bah Daniel W Marbaniang, u Secretary Bah Dondor Marweiñ lem bad kiwei ki para dkhot jong kane ka Synjuk ïakura ka Jylla.
Kine ki coach kiba la shah pynkup burom ki long u Torak Kharpran uba long uwei na ki coach uba la don bynta ban pynïaid ïa ka kynhun ki nongïakura jong ka ri India ha ka Paris Olympic 2024 bad u Bah Larry Kharpran uba la long kum u nongpeit pyrman ha katei ka lympung bah kaba la kut dang shen ha Paris.
Kawei pat kaba la shah pynkup burom ka long ka Priyanka, ka dei ka ‘thei ïakura kaba na Jhalupara, Shillong ka la khur ïa ka takma rnong dang shen ha ka Sub Junior Boys & Girls National Boxing Championships 2024 kaba la long ha Greater Noida, Uttar Pradesh naduh 19 haduh 25 tarik u Lber 2024.
Haba pynpaw sha ki lad pathai khubor, na ka liang u Bah Kharhunai u la pynpaw ka jingsngewkmen ïa kitei ki ar ngut ki coach ka Jylla kiba la ïadon bynta ha ka Paris Olympic. “Ngi dap da ka jingsngew sarong halor ka jingshah jied u Torak Khapran ban ïadon bynta kum uwei na ki coach na ka bynta ki kynhun ki nongïakura jong ka ri ha kawei ka lympung ha Paris bad kumjuh ïa u Bah Larry uba long u Joint Secretary jong ka Boxing Federation of India, uba la shah jied kum u nongpeit pyrman na ka bynta ka kynhun ki nongïakura.”
“Ngi pynpaw ka jingsarong halor ka jinglah ban ïalehkai bha ka Priyanka ha kaba ka la lah ban khur ïa ka takma rnong ha ka Sub Junior Boys & Girls National Boxing Championships 2024 kaba la long ha Greater Noida. Te kumta kum ka Synjuk ngi shim ïa kane ka kabu ban ai khublei bad kitbok kitrwiang ïa kane ka ‘thei ïakura ba kan nanglah ban kiew shaphrang ha ka kam ïalehkai ka jong ka,” la bynrap biang u Bah Cornelius.
