Shillong Nailar 25
Napdeng kiba bun ki MLA kiba la ryngkoh na kawei ka seng sha kawei pat ha kine ki khyndiat snem, ka Kong Ampareen Lyngdoh ka dei ka MLA ka banyngkong kaba nud ban iehnoh kam kum ka MLA ban ïakhun ïa ka ilekshon MLA shiteng samoi bad poi sha ka thong.
Nalor ka Kong Ampareen, uwei pat u MLA uba nud ban ïaid da ka lynti khlem kyntiap seng hynrei ban shu iehnoh ïa ka jinglong MLA u dei u MLA barim ka Ranikor konstitwensi u Martin M Danggo, tangba u khlem lah ban poi sha ka thong kum ka Kong Ampareen.
Kiwei ki MLA, ki babun na ki, haba ki leit ïasoh noh bad kawei pat ka seng saiñpyrthei, kim ju nud ban iehnoh kam, hynrei ki thaw lad ban ïoh ïa ka jingbunpaid ban leit ïalong kawei (merge) bad kawei pat ka seng.
Ka Kong Ampareen ka dei ka MLA kaba la shah jied nyngkong eh ha u snem 2008 kum ka MLA ka United Democratic Party (UDP) na Laitumkhrah konstitwensi. Hynrei haba ka Kong Ampareen lem bad ki nongkyrshan ki kwah ïa ka ba kan leit noh sha ka Congress, ka Kong Ampareen ka la rai ban shu iehnoh kam kum ka MLA ha u snem 2009 bad ka la ïakhun ïa ka ilekshon samoi kum ka kyrtong ka Congress bad ka la jop.
Shuh shuh, ka Kong Ampareen haba ka la shah sospon ha ka Congress ha u snem 2022, ka la bteng kum ka MLA khlem da kyntiap seng. Hynrei hashwa ba ka Kong Ampareen kan ïasoh bad ka National People’s Party (NPP) ka la iehnoh ïa ka jinglong MLA jong ka ha u snem 2023, bad ka la rung sha ka NPP ban ïakhun kum ka kyrtong jong ka NPP na East Shillong konstitwensi ha ka ilekshon MLA ha u snem 2023. Napdeng kiba bun ki MLA na kiwei ki seng kiba la rung sha ka NPP ha u snem 2023, dei teng ka Kong Ampareen, u Jimmy D Sangma bad u Marthon J Sangma kiba la shah jied biang kum ki MLA. Hynrei lah ban kdew ba kiba bun kiwei pat ki MLA kiba la iehnoh ïa ka Congress ne ïa kiwei pat ki seng ban leit ïasoh bad ka NPP kim shym la poi sha ka thong ha ka ilekshon MLA ha u snem 2023.
Haduh mynta ka Kong Ampareen kam pat kyntiap seng da kaba shu leit ïalong kawei (merge) kumba leh kiwei pat ki MLA.
Ha u snem 2022, shi kynhun ki MLA ka Congress ki la leit ban ïalong kawei bad ka TMC bad ki la kylla long ki MLA ka TMC khlem da ïakhun ïa ka ilekshon shiteng samoi.
Dang ha ka 19 tarik Nailar, 2024, lai ngut ki MLA ka Congress ki la phet ban leit long kawei (merge) noh bad ka NPP khlem da bud ban iehnoh ïa ka jinglong MLA na ka bynta ban ïakhun ïa ka ilekshon MLA shiteng samoi.
Kum ban pynkynmaw, u MLA barim ka Ranikor u Martin M Danggo u dei uba nud kum ka Kong Ampareen. U Danggo u dei uba la shah jied la bunsien na Ranikor konstitwensi kum u MLA ka Congress, hynrei ha u snem 2018 u la iehnoh kum u MLA ka Congress tang hadien khyndiat bnai ba la shah jied ha kaba u la iehnoh kum u MLA ka Congress bad ïakhun noh kum u kyrtong ka NPP ha ka ilekshon MLA shiteng samoi na Ranikor ha u Nailar, 2018.
Hynrei u Danggo u khlem lah ban poi sha ka thong namar u kyrtong ka UDP, u Bah Pius Marweiñ, u la jop ïa u ha ka ilekshon shiteng samoi.
Kumta haduh mynta, dei tang ka Kong Ampareen bad u Danggo kiba nud ban iehnoh ïa ka jinglong MLA na ka bynta ban ïakhun na kawei pat ka seng ha ka ilekshon shiteng samoi.
U Bah Sanbor Shullai ruh u dei uwei na ki MLA uba lah ban poi sha ka thong wat haba u kynriah na kawei ka seng sha kawei pat da kaba shu iehnoh kam hashwa ban kut ka samoi treikam kaba san snem.
Ha u snem 2018, u Bah Sanbor u la kynriah na ka NCP sha ka BJP bad u la ïakhun kum u kyrtong ka BJP bad poi shah jied biang kum u MLA ka South Shillong konstitwensi.
