Shillong, Nailar 26
Ki dkhot jong ka KSU Mairang Circle ba la lam khmat da u Assistant Secretary u samla Khrawjutang Kharsyntiew ryngkat bad ki dkhot ha ka 23 tarik Nailar ki la ïoh bat 10 ngut ki nongbylla bar jylla kiba trei bylla ha PHE Mairang khlem ki kot ki sla kiba biang.
Ha u kyrwoh ba la phah da ka KSU Mairang Circle ryngkat bad ki dur, ka seng ka la pyntip ba haba la pan ïa ki kot ki sla jong kine ki bar jylla kim shym la don satia ïa ki kot kiba biang bad ka seng ka la kam ruh ba kine ki nongbylla bar jylla ki la pynkheiñ ïa ka aiñ Inter-State Migrant Workmen (Regulation of Employment and Conditions of Service) Amendment Act, 2011.
Ka seng mar mar ka la bat ïa kine ki bar jylla kiba thmu ban trei bylla khlem ki kot ki sla bad ki bor ba dei peit jong ka BSC Company ki la wan ban ïakynduh ïa ki nongïalam jong ka seng ha kaba ki la mynjur ruh ban pynphai noh shi syndon ïa kine ki nongtrei bar jylla ki bym don ïa ki kot ki sla bad ban ym wanrah shuh ïa ki nongtrei bar jylla khlem ki kot ki sla kiba biang. Ka seng ka la ban jur ruh ba kan ym aili da leilei ruh ïa kiba wanrah da ki briew kiba nabar da kaba ai daw ïa ki kam ba ki samla Khasi kim lah ban trei namarba kine ki shu long tang ki daw hynrei bun hi kiba kwah wanrah briew nabar dei tang na ka dor bylla kaba rit katba ka rukom trei pat ka dei kumjuh hi kumba trei lem ki samla Khasi, la ong u kyrwoh.
