Jowai, Nailar 26
Ki 34 ngut khynnah bad samla ïalehkai Badminton ka West Jaiñtia Hills District kin pynkhreh ban leit shim bynta ha ka lympung ïalehkai “39th Meghalaya State Badminton Championship 2024” ka ban long ha nongbah Shillong naduh ka 28 tarik haduh 31 tarik mynta u bnai ha Multi Purpose Sports Hall jong ka SAI Training Centre kaba don ha Nehu, Shillong.
Ban ai mynsiem ïa kine ki khynnah bad samla ïalehkai, ka West Jaiñtia District Badminton Association (WJDBA) ha ka janmiet jong ka lah sngi U Blei ka la pynlong da ka jingïalang leh burom na ka bynta kane ka jingleit ïashim bynta kane ka kynhun.
Napdeng ki 34 ngut ki khynnah ïalehkai kiba ka synjuk ka la ïoh ban phah ki kynthup 4 ngut ha ka Under-13 Boys, 8 ngut ha ka Under-15 Boys & Girls, 5 ngut ha ka Under-17 Boys & Girls, 5 ngut ha ka Under-19 Boys bad 12 ngut ha ka Senior Level Men & Women.
Ïa ka jingïalang la pynlong ha Seinraij Indoor Sports Complex, Tpep Pale ha ka jingdonlang u President ka synjuk u Bah D. Pyrbot, u Secretary Rimilan Passah nalor kiwei kiwei ki dkhot bad nongkitkam ka WJDBA.
U President Bah D. Pyrbot bad Secretary Bah Rimilan Passah ki la kyntu ïa baroh ki nongïashim bynta ban trei shitom bad ïalehkai bha bad la kitbok kitrwiang ruh ba kin poi sha ka thong ban wanrah nam bad burom ïa ka District baroh kawei.
Ïa kine ki khynnah yn leit synran lang da ki Coach Bah Sienwan Shylla, Hrisami Passah bad Manager Yutang Kma bad kin mih napoh ka District ha ka sngi Ba-ar.
