Guwahati, Nailar:
U Myntri Rangbah jong ka Assam u Himanta Biswa Sarma u la kynthoh jur ïa ka seng Congress, ha kaba u la kynnoh ba ka la ïatreilang bad ki kynhun kiba dei ki nongkyrshan jong ka Pakistan.
Kine ki jingkren jong u Sarma ki la long ka jingai jubab halor ki mat treikam jong ka Jammu & Kashmir National Conference (JKNC), ha kaba u la pynshisha da kaba ong ba u dap da ka jingsngewkhia halor ka jingleh jong ka seng Congress.
“Ngam shym poi pyrkhat ei ei ba ka seng Congress kan ïatreilang na ka bynta ka jingïatylli bad ka burom jong ka ri jong ngi,” la ong u Sarma, haba u la kren halor ka jingïatreilang hapdeng ka seng Congress bad kum ki briew uba nabar ri kum u George Soros.
“Ym lah shuh ban buhrieh ïa ka jingïadei jong ki. Ka la pynbna ba ka seng Congress mytna ka la ïatreilang bad ka seng kaba ai jingkyrshan ïa ka Pakistan. Kane ka long pyrshah halor ka jinglen lade jong ki shipai ka ri.”
U Sarma shuh shuh u la maham ba haba ong ba lada kum kine ki seng ba paw khmat ki sdang ban ïatreilang bad ki kynhun kiba long pyrshah ïa ka hok jong ka ri India, ka paw ba ka buh jingma shibun ïa ka synshar paidbah ha ka ri.
“La ka long na ka liang synshar ne na ka liang pyrshah, ka long kaba kongsan ban ïatreilang na ka bynta ka jingshngaiñ hapoh ka ri bad ban ai ka jingkyrshan ïa ki shipai ïada ri jong ngi,” u la bynrap.
Ka Bharatiya Janata Party (BJP) ka la kynthoh ruh ïa ka seng Congress ha ka 23 tarik, Nailar halor ka jingïatreilang bad ka seng National Conference (NC) hashwa ka jingpynlong ïa ka ilekshon ha Jammu & Kashmir.
Ka seng BJP ka la thalaiñ tyngeh ïa ka seng Congress da kaba khmih bniah halor ki mat treikam jong ka NC, kaba kynthup ha kaba ïadei bad ka jingkular ban buh bad pyntreikam biang ïa ka Articles 370 bad 35A ki khyrnit ba la sloit da ka sorkar kmie hapoh ka jingïalam jong ka seng BJP.
