Shillong, Nailar 26
Ka kynhun ïalehkai U-20 jong ka ri India ka la mad ïa ka jingshah rem noh da 3-4 kol lyngba ka tie-breaker ha ka Bangladesh hadien ba ki la ïakhaid mar 1-1 kol haduh kaba kut ka jingïalehkai semi-final jong ka SAFF U20 Championship kaba la long ha ANFA Complex kaba ha Lalitpur, Nepal ha ka lah sngi U Blei.
Ha kane ka jingïakhun baroh ar ki kynhun ki la ïakhun tyngeh naduh kaba sdang. Hadien shiteng kynta ka Bangladesh ka la ïoh ban pynkhih jar nyngkong eh lyngba u Asadul Islam Sakib ha ka minit kaba 36 na ka bynta ban tam shi kol ha ka kylla step.
Hadien katto katne por ba la bteng ïa ka jingïakhun jong ka kylla miet ba ka India ka la lah ban pynphai kylla lyngba u Ricky Meetei Haobam ha ka minit kaba 75 na ka bynta ban ïakhaid haduh kaba kut ka jingïalehkai.
Dei ha ka jingïashut tie-breaker ba ka Bangladesh ka la lah ban tam da 4-3 kol na ka bynta ban khur syndon ïa ka jingjop. Te kumta ka Bangladesh kan ïakynduh final pyrshah ïa ka Nepal ka ban long ha ka sngi Balang.
