Shillong, Nailar 26
U Myntri Rangbah barim ba Jylla bad nongïalam ka Trinamool Congress (TMC), Dr. Mukul Sangma, u la kren shai ba un ym leit pynïasoh sha kano-kano ka seng saiñ pyrthei naba u hun ha ka seng kaba u don mynta.
“Ngam donkam ban leit pynïasoh sha kawei pat ka seng saiñpyrthei…nga kmen shikatdei eh haei ba nga don,” la ong u Dr. Sangma haba jubab la u don jingthmu ne em ban leit pynïasoh sha ka BJP ne Congress hadien-habud.
Haba kren shaphang ka TMC, u la ong ba ka seng ka don 5 ngut ki MLA bad na kine, 2 ngut ki la jop ha ka sien banyngkong, watla ki la ïakhun na kiwei-kiwei ki seng saiñpyrthei kumjuh kum ki kyrtong shimet hashuwa, hynrei mynta ki la jop.
“Kam don ka lynti kaba suk. Haba tei ïa kano-kano seng saiñ pyrthei bathymmai, hooid kin don ki jingtynjuh, kam don kaei-kaei kaba suk. Donkam ïa ka jingïaishah bad ngin hap sngewnguh ïa ki briew kiba la ïeng ha syndah bad ngi watla ngi don tang khyndiat ka por ban leit sha ki paidbah ban pynithuh ïalade bad kane ka jingpynithuh thymmai,” la ong u Dr. Sangma.
U la ong ruh ba kane ka jingpynithuh bathymmai ka wan ha ryngkat shibun kiei-kiei namar kiba bun ki bynta kiba long pher bad ka Jylla bad watla kiba pyrshah ki pyrshang ban wanrah ïa ki jingpynsngewthuh bakla haba ïadei bad ka seng, hynrei kum ka seng kam khuslai ïa kine.
“Phin sa ïohi ha kane ka ilekshon shiteng samoi (Gambegre), ngin sa jop,” u la ong.
Ha kawei ka liang, haba kren halor ka jinglong-jingman ka saiñ pyrthei ha ka ri kaba la wan jia bad ka ban sa jia ha ki snem ban wan, utei u nongïalam ka TMC u la ong ba dang ha ka ilekshon MP, watla ki la don bun bah ki jingkam kum na ka BJP (Isbar 400 Paar) bad kiwei-kiwei ki seng ha kylleng ka ri kumjuh ka Congress, hynrei ha kaba kut, la sakhi ïa ka rai kaba wan na u paidbah ha kylleng ka ri.
“Ka jinglong-jingman ka saiñpyrthei ha ka ri baroh kawei ka la kylla…ka jingbuh thong ka BJP ka la shah pynsangeh ha ki seng riewlum ha kylleng ka ri. Kumjuh ka la jia ïa ka Congress, namar ki jaka ha kaba ki seng riewlum ki la ri la ker kyndong, ka Congress ruh kam shym la lah ban tam ïa ka 99,” u la ong.
U la ban jur ba ka jinglong-jingman ka saiñpyrthei ha ka ri ka long ba mynta bad ha ki snem ban wan, kin don palat 200 tylli ki jaka na ka 543 ha Lok Sabha ki ban leit sha ki seng riewlum.
“Ka ban sah kan long kumba 300-350, kine kin dei ki jaka na bynta ki seng heh ka ri – BJP bad Congress, baroh kiwei pat kin don hapoh jong ki seng riewlum kiba la pyni ïa ka jingkhlaiñ jong ki ban ïada ïa la ki jaka,” ong u Dr. Sangma.
Haba kdew ba kane ka jinglong-jingman ka saiñ pyrthei ka manbha na bynta ka ri ha ka rukom pynïaid ïa ka synshar paidbah,u la ong, “Ka bha…phi tip balei nga ong ba ka bha namar ka jingmlien barabor jong ki seng heh ka ri ban leh ba-heh ha ka jingïaid lynti jong ki kan ym urlong shuh bad kane ka la sdang ban jah suki-suki.”
Shuh shuh u la bynrap ba mynta ki Jylla kin hap ban ïeng skhem bad pyntikna ba ka sur jong ki seng bapher-bapher kiba mihkhmat na bynta ka bha ka miat jong ki paidbah ha ki bynta bapher-bapher jong ka ri, la pynsngew ka rukom ba dei bad ba kan ym poi ha ki shkor ba kyllut.
“Te kane kaei ka ban sa jia ha ka ri baroh kawei,” u la ong.
