Jowai, Nailar 26
Ka Myrjai bad ka Pasyih Cultural ki la rung sha ka quarter final jong ka lympung ïalehkai 3rd Division Football Tournament-4th Adelbert Laloo Memorial Trophy ba la pynïaid da ka West Jaiñtia District Sports Association (WJDSA).
Kane ka la wan hadien ba ka Myrjai bad ka Pasyih Cultural ki la khur jingjop ha ka jingialehkai pre-quarter final kaba la long ha madan Kiang Nangbah Stadium, Jowai ha ka lah sngi U Blei.
Ha kane ka jingïakhun ka Myrjai ka la pynliem noh ïa ka Mookynphad Mihmyntdu da 4-0. Ïa kine ki kol la thep da u Sperbha Syntem ha ka minit kaba 28 bad 62, u Elad Dhar ha ka minit kaba 63 bad u Bison Kyndait ha ka minit kaba 73.
Ha ka jingïalehkai kaba bud ka Pasyih Cultural ka la pynliem ïa ka Madan Thadmuthlong da 3-2. Ïa ki kol jong ka Pasyih la thep ar kol da u Deibha Dkhar ha ka minit kaba 52 bad 80, u Seiborlang Dkhar ha ka minit kaba 80+2. Katba ïa ki kol jong ka Madan Thadmuthlong la thep da u Precious Tang ha ka minit kaba 14 bad 32.
Ka jingïakhun pre-quarter kaba khatduh kan long ha ka sngi Ba-ar hapdeng ka Mookaswan Dongwah pyrshah ïa ka Mookyrdup ha ka por 12:30 baje mynsngi, katba ka Mulang Ïalong ïa ka Da I hi Mynsngat ha ka por 2 baje nohphai sngi.
