New Delhi, Nailar:
Ki bor pynïaid ka India, ha kane ka por ki la ioh jingip ba ki 2 ngut ki nongmihkhmat na Bangladesh kiba shakri ha India, ki dei kiba la shah weng kam noh na Bangladesh da ki bor pynïaid jong ka sorkar shipor ha Bangladesh. U Shaban Mahmud, uba shakri kum u First Secretary (Press) ha Bangladesh High Commission ha New Delhi, u la bthah ba un ieh noh ia ka kam shuwa ban kut ka kontrak jongu. Kumjuh ruh u Ranjan Sen uba shakri ha kajuh ka kyrdan ha ka tnat Consulate jong ka Bangladesh ha Kolkata ruh u la shah weng noh na ka kam kumba la leh ia utei uwei u nongialam ka Bangladesh.
Ïa kane ka sorkar ba shipor jong ka Bangladesh, kaba la khlieh da u u Muhammad Yunus, dang shu lah thaw thymmai ha kine ki khyndiat taiew ba la leit, hadien ba la sakhi ia ka jingpyrshah jong ki paidbah ia ka sorkar barim bad kaba la pynlong ruh ia ka Myntri Rangbahduh barim ka ri Bangladesh- ka Sheikh Hasina, ba kan ieh noh ia ka kam bad ka la leit phet rieh noh shipor sha India ban lait na ki kynrum- kynram bad ki jingma lada ka shong pyn-eh hapoh Bangladesh.
La ong ba ha ka 5 tarik u Nailar jong une u snem, ka Sheikh Hasina, kaba la don 76 snem ka rta, ka la phet krad na Bangladesh da ka liengsuiñ ba la kit noh ia ka sha India, hadien ba bun bah ki paidbah nongïakhih ki la tyllep ïa ki surok jong ka nongbah Dhaka. Namar la ong ba kitei ki paidbah nongiakhih ki la bitar ia ka rukom synshar jongka, kaba la neh 15 snem mynta, ha kaba ki la kynnoh ba katei ka nongialam ka la pynkheiñ ia ka hok longbriew- manbriew bad kumta ki lah shuh ban dang ialad ia ka, ba kan bteng ia kum katei ka rukom synshar kaba pynhiar pynban ia ka jinglong- jingman hapoh ka ri bad kaba pyniap ia ka ioh- ka kot jong ka ri baroh kawei.
Hynrei, la ong ba wat hapdeng ka jingphetwir jong ka Hasina sha India, u Yunus uba long u Myntri Rangbahduh ba shipor katei ka ri, ha kane ka por u la pynskhem ba ka sorkar jong u kan iai bteng ban pynroi ia ka jingiadei paralok bad baroh ki ri ka pyrthei bad kan ialeh ruh ban khyllie ia ki jingduh nong bad khamtam eh ia ka ioh- ka kot jong ka Bangladesh watla ka ioh ban shakri tang ha i por i ba khyndiat.
Ha ka jingkren jong u sha ki ri ka pyrthei ha kaba sdang jong une u bnai, u Yunus u la pan ia ka jingkyrshan iai bteng bad iai neh na ki para marjan ri baroh, naka bynta ban tei pat ia ka Bangladesh bad ban pynkylla dur ia ka rukom synshar- khaddar ha katei ka ri – sha ka synshar paidbah kaba treikam pura.
