Shillong, Nailar 27
Ka Meghalaya ka la sakhi ïa ka jingkiew jong ki nongdih drok hapoh ka jylla shaduh ka 3 lak ngut wat hadien ba na ka liang ka Sorkar Jylla ka la dep mang T. 50 klur ban ïakhun pyrshah ïa ka kam khaïi drok bad jingbuh ïa bun tylli ki Rehabilitation Centre ban sumar ïa ki nongdih drok.
Ïa kane la pyntip da u Myntri ka tnat Social Welfare, u Bah Paul Lyngdoh,ha ka Sngi Ba-Ar haba jubab ïa ka jingkylli kaba la wanrah da u MLA ka VPP na Mawryngkneng u Bah Heaving Stone Kharpran ha ka kynta kylli jingkylli ha Ïingdorbar Thawaiñ ha ka Dorbar Synrai.
U Bah Paul u la ong katkum ka jingkheiñ kaba la ïoh lum, kin don haduh kumba 3 lak ngut ki nongdih drok hapoh ka jylla.
U la ong, “Naduh ba la wanrah ïa ka projek Drug Reduction Elimination and Action Mission (DREAM), ka sorkar jylla ka la dep mang pisa haduh T. 50 klur ban ïakhun pyrshah ïa u drok bad hapoh kane ka projek, ka sorkar jylla ka la ïaid shakhmat ban thaw kham bun tylli ki De-addiction Centre ha kylleng ki bynta jong ka jylla.”
Halor ka jingsngewkhia kaba la pynpaw da ki MLA ka Liang Pyrshah ha kaba ïadei bad ka jingïoh duna jong ka jingbei pisa na ka Sorkar Pdeng ban ïakhun pyrshah ïa ka jingkyrni ha u drok, u Bah Paul u la ong, “Nga la dep ban don ka jingïadei bad ka Ministry ha Delhi bad shen ngan sa ïakynduh ïa u Myntri ba dei khmih ynda la kut ka Dorbar Synrai.”
U MLA ka VPP na Nongkrem u Bah Ardent M Basaïawmoit u la pynpaw ka jingsngewkhia halor ka jingkynrei jong u drok kaba la ktah ïa ka jylla bad kyntu ïa ka sorkar ba kan shim ki lad ki lynti ban wad shuh ka jingbei pisa na ka Sorkar Kmie ha ka ban ïakhun pyrshah ïa kane ka jingeh.
Kham hashwa, u Myntri u la pyntip hapoh ka Ïingdorbar ba ki don 10 tylli ki Rehabilitation Centre hapoh ka jylla. Napdeng kine, hynriew tylli ki dei kiba la kyrshan da ka Sorkar Jylla lyngba ka tnat Social Welfare kata lyngba ka Public Private Partnership bad ki seng treimon sngewbha kiba tbit bad shemphang.
U la ong ba kawei kawei ka jaka sumar ka lah ban pdiang tang 15 haduh 20 ngut, lada shim 20 ngut ruh kan ngiam 200 ngut ha kine ki jaka sumar bad pyntip ruh ba ka sorkar kala shimkhia ïa kane bad mynta ka dang pynkhreh ban buh ha baroh 12 tylli ki District ïa ki jaka ai jingsumar.
