Shillong, Nailar 27
Watla ka sorkar jylla kam pat pynbna ïa ka ilekshon ban jied thymmai ïa ki MDC ha Khasi Hills Autonomous District Council (KHADC) hynrei kiba thmu ban aireng ki la sdang ban pan tiket na ki seng saiñpyrthei bapher bapher.
Lada phai sha Jaïaw konstitwensi kaba hap ha sor Shillong, ki don haduh hynriew ngut ki nongkyrshan kiba hakhmat ka Voice of the People Party (VPP) kiba la pan tiket na ka bynta ban ïakhun ïa ka ilekshon MDC.
Kine ki hynriew ngut ki long u Denzil Chen, Strong Kharjana, Den Hill Lyngdoh Talang, Reginal Thabah, Nickson Dohling bad uwei u nongïasaid aiñ u bym pat ïoh kyrteng.
Napdeng kine ki hynriew ngut kiba pan tiket uwei un sa shah jied na ka Central Election Committee ryngkat ka jingmynjur lang u MLA ka VPP na North Shillong, u Bah Adelbert Nongrum.
Kane ka jingbun kiba pan tiket namar ka Jaïaw konstitwensi ha ka ilekshon MDC ki kynthup ïa ar tylli ki constituency ha ka ilekshon MLA kata ka North Shillong ba long MLA da u Bah Adelbert bad ka West Shillong kaba long MLA da u Bah Paul Lyngdoh na ka seng UDP.
La ïoh jingtip ba ka VPP kan sa pynbna ïa ki kyrteng jong ki kyrtong ynda ka sorkar jylla ka la pynbna ïa ka tarik ban pynlong ilekshon MDC ha KHADC bad JHADC.
Ka jingjop ka VPP ïa ka ilekshon MP Lok Sabha ka la pynlong ïa ki nongkyrshan ba hakhmat ban pynrhem ban pan tiket namar ki don jingkyrmen ba ki paidbah kin jied beit ïa u kyrtong ka VPP ha ka ilekshon MDC.
