Shillong, Nailar 27
U President ka Voice of the People Party (VPP), Bah Ardent M. Basaïawmoit, ha ka Sngi Ba-ar u la ai khublei ïa u Myntri Rangbah ka Jylla, u Conrad K. Sangma, bad ka kynhun jong u halor ka jingtbit jong ki ban ‘khwai’ ïa lai ngut ki MLA na ka liang pyrshah myn ha kane ka taïew ba la dep.
“Nga kwah ban ai khublei ha ka jingshisha ïa u Myntri Rangbah ka Jylla bad ka kynhun jong u, ka liang synshar, kiba la pyni ïa ka jingtbit jong ki ban khwai ha kaba ki la seisoh ban khwai ïa lai ngut ki MLA na kane ka liang bad mynta ki la don shatai ka liang,” la ong u Bah Basaïawmoit hashuwa ban kren halor ka ‘Short Duration’ hapoh Ïingdorbar Thawaiñ.
Ha kajuh ka por, u la phah ka jingkitbok kitrwiang sha u Myntri Rangbah ban ïoh noh kloi ïa ka jingkhoit jingkhiah khnang ba un ïoh wan ïashim bynta hapoh ïingdorbar.
Halor katei ka bynta, u Symbud Myntri Rangbah ka Jylla, Bah Prestone Tynsong hashuwa ban jubab ïa ka ‘Short Duration’ u la ong, “Ka MDA bad ka NPP kim dei ki nongkhwai, hynrei hooid, ngi pdiang sngewbha ïano-ïano kiba kwah wan pynïasoh sha ka NPP.”
U la ong ruh, “Nga tharai ba kane ka la pynshisha ba ka NPP ka la pyni ïa ka jingthmu ba bha ha ka ban shakri ïa ka Jylla.”
Kumban shu kdew hangne, lai ngut ki MLA ka Congress ba kynthup ïa u Dr. Celestine Lyngdoh (Umsning), Bah Charles Marngar (Mawhati) bad Bah Gabriel Wahlang (Nongstoiñ) ki la leit ban pynïasoh noh sha ka National People’s Party (NPP) ha ka taïew ba la dep.
Da ka jingleit pynïasoh noh jong kine ki lai ngut ki MLA sha ka liang synshar, ka liang pyrshah mynta ka la sah sa tang 10 ngut ki MLA ba kynthup ïa 5 ngut na TMC, 4 ngut na VPP bad 1 na ka Congress.
