Shillong, Nailar 27
Ka lahduh jong u snem ba la lah, ka Mohun Bagan Super Giant ka la lah ban pynthikna ban jam biang sa shisien sha ka final ha ka lympung ïalehkai 133rd IndianOil Durand Cup hadien ba ka lah ban pynliem noh ïa ka Bengaluru FC lyngba ka tie-breaker da 4-2 kol ha ka sngi Ba-ar.
Te kumta ka Mohun Bagan kan pynkhreh ban ïaknieh biang ïa ka nam lahduh pyrshah ïa ka NorthEast United FC ha ka jingïakhun final ka ban long ha ka 31 tarik na ka bynta ban khur ïa ka rekod kaba 18 sien bad kan dei ka sien kaba nyngkong ïa ka United lada ka lah ban khur ïa ka jingjop pyrshah ïa katei ka kynhun ba khlaiñ bor kaba na Kolkata.
Haba phai sha kane ka jingïakhun semi final kaba ar kaba la long ha Vive-kananda Yuba Bharati Krirangan (VYBK) baroh ar ki kynhun ki la ïakhun tyngeh naduh kaba sdang. Ka Bengaluru ka la ïoh ban pynkhih jar nyngkong eh lyngba ka penalty ba la shut da u Sunil Chhetri ha ka minit kaba 42 na ka bynta ban tam shi kol ha ka kylla step.
Ka BFC ka la pynbud biang ïa ka kol kaba ar ha ka kylla miet lyngba u Vinith Venkatesh ha ka minit kaba 51 na ka bynta ban tam da 2-0 kol. Hynrei tang hadien katto katne por ka Mohun Bagan ka la lah ban pynphai kylla lyngba ka penalty ba la shut da u Dimitri Petratos ha ka minit kaba 68. Kane ka kynhun ka la lah ban pynïakhaid hadien ba ka la ïoh ban thep biang ïa ka kol kaba ar lyngba u Anuruddh Thapa ha ka minit kaba 84.
Dei lyngba ka jingïashut tie-breaker ba ka Mohun Bagan ka la lah ban tam da 4-3 kol ïa ka BFC na ka bynta ban khur syndon ïa ka jingjop.
