Shillong, Nailar 27
U Secretary Shnong jong ka Dorbar Shnong Nongsohphoh, Upper Mawprem, u Bah Hardy Ryntathiang, u la shah ujor ejahar bad shah khot hajir ha ki pulit ka thanat Lumdiengjri ha ka Sngi Ba-Ar halor ka jingkhynra drok jong ka Joint Action Committee (JAC) ha ka 17 tarik Nailar 2024 bad ka jingshah ujor ejahar jong une u nongïalam shnong pat ka dei kaba la ai da kawei ka kynthei briew ka bym dei ka Khasi kaba la kynnoh ba une u nongïalam shnong u la ktah kti ïa ka.
Kum ban shu kdew hangne ba katei ka kynthei briew ha ka 17 tarik Nailar 2024 ka la shah kem ha ka JAC kaba la leit ban khynra drok ha katei ka sngi kaba kynthup ïa ka seng Khasi Students’ Union (KSU), ka Federation of Khasi Jaiñtia and Garo People (FKJGP), ka Dorbar Shnong Mawbah bad ka Dorbar Shnong Nongsohphoh.
Haba kren sha ki lad pathai khubor, u Rangbah Shnong ka Nongsohphoh, Upper Mawprem, u Bah Johnny Kharmawlong, u la ïathuh ba ha ka 17 tarik Nailar, na ka liang JAC ha ka jingkhynra ïa ki bar jylla ka la ïoh ban kem ïa ki khynnah kiba dang thmu ban thied drok bad na ka jingïoh kem ïa kitei ki khynnah, ka JAC ka la ïoh sabut bad kem sa ïa ki arngut ki kynthei kiba dei shi kmie shi khun ha kaba la ïalam ïa ki hapoh ka ïing dorbar shnong ha ryngkat ka jingïadonlang ki seng longkmie ka shnong.
“Ngi kum ka JAC, ngi khlem shim ïa ka aiñ ha ka kti hynrei ynda ngi la kem ruh, ngi la pyntip sha ki bor ba dei peit hynrei kyndit-kyndit, ngi la ïoh jingtip ba u Secretary shnong ka Nongsohphoh un hap wan ban hajir hapoh thanat,” la ong u Bah Kharmawlong.
U Bah Kharmawlong u la ong ba na ka por sha ka por, ka sorkar ka ju ong ba ki Dorbar Shnong ban ïatreilang bad ka tnad pulit ban rat dyngkhong ïa u drok hynrei lada u Secretary shnong uba la shah pynkupbor pat ynda u la leh ïa kata ka kam ba bha, u shah khot hajir pynban shapoh thanat, ka pynlong ïa kiwei pat ki briew kiba thmu ban leh ïa ka kam ba bha ba kin salia noh ban mih shakhmat namar ha kaba kut ki shah pynngat kylla ïalade.
Na ka liang u Rangbah Shnong bad ka JAC ki la kyntait ïa ka jingkynnoh jong katei ka briew ba u Secretary Shnong u la ktah kti ïa ka bad ong ba ha katei ka sngi la ïadonlang naduh ki nongïalam shnong, longkmie, seng bad la aiti ruh ïa ki ha ki bor jong ka aiñ.
Ha katei ka sngi leit hajir, la wan ban synranlang ïa u Secretary ka Dorbar Shnong Nongsohphoh da ki nongkitkam ka JAC Nongsohphoh Upper Mawprem, Mawbah, ki longkmie sha thanat Lumdiengjri.
Na ka liang ki longkmie jong kane ka shnong ki la kynnoh ba utei u Secretary Shnong u la shah ujor ejahar ha kawei ka briew kaba la suba jur ba ka lah ban dei ka nongkhaïi drok.
