Raphael Warjri
Ka dei ka jinglong briew ha satlak pyrthei ba ki riew shimet ki pyrkhat ïa kiei kiei ha la marwei kiba ïapher na kiwei pat, bad kata ka lah ban long ha kajuh ka longïing longsem, ha kajuh ka seng, ha kajuh ka niam ha kajuh ka kynhun ka ba thmu ia kajuh ka thong, bad khamtam lei lei ha ka saiñpyrthei kaba da shynna tyngkreiñ. Katba kita kiba dei na kajuh ka kynhun ki ïapher jingmut ha ka lynti ban poi sha kajuh ka thong, ka lah ban don ka thombor ka ban pynlong ïa kiwei ban khñium ban bynñiaw. Hynrei katba ka jinglong ban pynpaw pyrshah la ka jingsngew shimet ka paw markylliang katta ka dang bha wat lada don ka jingïakhing. Hynrei kaba ma ba mynsaw ïa ka imlang sahlang ka long lada don kiba leh buitpoh buitthok bad leh arsap arphong. La ju don ki khep haba kito kiba ym lah ban pynksan ïa ka pyrkhat lajong bad ki dei ban kohnguh ïa ka jong kiwei khlem da mon naduh la mynsiem. Kum ha kata ka rukom ka don ka atnud ha lyndet kaba ym ju pynpaw bad phuh samrkhie jubor da ka jinglong arsap. Kum kata ka rukom ka pyntroiñ ïa ka kynhun bad jynjar ban lumlang ïa ka jing-thmu kyllum jong ka kynhun. Ki briew shimet kiba proh jabieng shisha bad kiba don ka phangma kaba jngai ki dei ruh ban don ka bor ka iktiar ban khring ïa ki para-dkhot ha ka kynhun ba kin kohnguh da kaba jynsur mynsiem bad da kaba pdiang sngur mynsiem ynda la peiphang ïa ka pyrkhat kaba dei ban myntoi kyllum lang.
Ban lah ban kynjoh kum kata ka pyrkhat kaba lah ban pynskhem salonsar ïa baroh ki paradkhot ha ka kynhun, ka shong ha ka bor shemphang jong kita ki riew shimet kiba proh jabieng. Ka long kaei kaei kaba suk lehse ban pynkohnguh skhem ha iwei ar ngut ki briew ha ka kynhun, khamtam lada dei kiba la noh lypa ka mon sha kita kiba dei ban lamkhmat. Hynrei ïa kiba bun ba lang da ki phew ne spah ngut kan long kaba kham jwat, hynrei jar la katta ka shong ha ka jingtbit jong kita ki khlieh nongïalam kumno ba ki lah ban pynkohnguh skhem ïa ki paidbyllien. Ha kane ka liang ka lah ruh ban don da ka buitthaw kaba lah ban khring paidbah sha kata ka jinghikai jong kita kiba lamkhmat. Nalor ka buitthaw ka don ruh ka jingkheiñ kumno ban khring ïa ki paidbah paidsan, ka ba don la kajong pat ka jingkheiñ lada thew ïa ki paidknup paidtrap ba yn lah ban wanrah lang ha kajuh ka thup ba kin ïa mynjur lang shitylli. Ka long kaba suk pat ban khring ïa ki paidkar ki paidbhur kiba shongshit khleh bieit kat shaba beh ka lyer na ka sur ki nongïalam. Hynrei lada bakla tiak wat ki paidbhur paidkar ruh ki lah ban kyntait lada bakla ka jingkheiñ.
Kata ka lah ban long ha kaba ïalap niam, ha kaba ïalap ha ki lympung saiñpyrthei, ha ki sengbhalang lane ha kino kino ki kynhun ba don ka jingthmu kaba kyllum lang. Ka saiñpyrkhat jong kano kano ka kynhun ka dei ban long kaba kdup ïa ki paidbynriew ha ka imlang sahlang khnang ban lah ban lum paid ki ban buddien ïa ki nongïalam. Ym lah ban len ba ha ka pyrthei ka jingim jong U Jisu Khrist ka long ka ba la bna nam ha satlak pyrthei, khamtam haba ki kynhun Khristan ki la pdiang ïa U kum U Blei. Hynrei dei ban tip ïa ka jingshisha ba ki don kiwei pat ki ba ym pat lah ban pdiang kiba dang byllai bad ym lah ban pyntian jubor ïa kata ka jingngeit ha ka pyrkhat shimet jong ki. Jar la katta, ka ju long barabor ka jingpyrshang kaba jubor jong ki riewtrei shitrhem jong ki niam Khristan ban khring ïa ki paidbah sha ka thup jong ki balang Khristan. Khlem artatien ym da dei eh na ka jingtbit jong kita kiba ïalap ba lah ban pynurlong ïa ka jingthmu ban khring paidbah, namar ka jingim bakhraw na ka jinglehrit jong u Jisu Khrist ka la palat liam ban khring lypa ïa ki paidbah paidsan, khlem da kheiñ ïa ki paidknup paidtrap ne ïa ki paidkar paidbhur. Baroh kiba ïalap ïa kano kano ka saiñpyrkhat ki dei ki ba thmu ban bha ïa ki paidbah ha ka imlang sahlang, hynrei ka lah ban bakla noh na ka daw ba ym don u nongmuna ba shynna bad kynsai kumba long ka jingim jong u Jisu Khrist. Hynrei ka jingshisha ka long ba ki paidbynriew na shiliang duriaw jong ka dewbah thaiñ sepngi ha pyrthei ki dei ki ba la ïaid lyngba kiei kiei ki jingïatyngkhuh ha ka imlang sahlang kylleng satlak pyrthei.
Ha ka jingshisha ka jingim jong u Gautama Buddha ruh ka dei kawei na kiba kynsai tam ha ka jingim briew. Hynrei namar ba u dei na ka thaiñ kaba dang ïaisan ka shai pyrthei katkum ka juk mynta kumta ym da lah than ban khring paidbah kumba khring ki balang Khristan. Nalor kata ka niam Buddhist kam dei ka niam ba ïalap ha rynsan paidbah kumba long baroh ki balang Khristan ha satlak pyrthei. Kumta lada bishar sani ka paw ba kumba na ki sawphew hajar tam ki balang Khristan ha pyrthei kiba bun ki dei kiba shim kabu ïa ka jingim jong u Jisu Khrist na ka bynta ban khring paidbah ban pynrasong la ka kynhun na ka bynta ban myntoi ïalade ha baroh ki liang. Ha kata ka rukom ka nongrim jong ka jingim riewblei bad ka jingproh jabieng jong ki nongïalap ba shitrhem ka kynthup lang ban pynkhlaiñ bad pynrasong ïa ka niam Khristan ha satlak pyrthei.
