Shillong, Nailar 27
Ka SWKHD Badminton Association ka la aikhublei kitbok kitrwiang ïa ki samla bad ki heprit ki ban mihkhmat ïa ka district sha ka lympung ïalehkai 39th State Badminton Championship 2024 ka ban sdang naduh ka sngi Balang ha Indoor Sports Hall jong ka SAI Training Centre kaba don ha NEHU, Mawlai.
Ïa kane la pynlong ha ka jingïalang kaba la long ha ka sngi Ba-ar ha kaba la iadonlang u Bah H.S Diengdoh, President SWKHD Badminton Association, ki coach, manager ryngkat ki kmie ki kpa kiba la wan ban synran bad ai mynsiem ia ki khun shwa ban kin mih na Mawkyrwat.
Katei ka synjuk ha kane ka kynti ba mynta ka la phah haduh 27 ngut ki nongialehkai ki ban iashim bynta ha katei ka lympung ha la ki jong ki kyrdan kata ka Under-13, Under-16, Under-17, Under-19 bad Senior.
