Shillong, Nailar 27
Ka Myntri ka tnat Information and Public Relations, ka Kong Ampareen Lyngdoh, ha ka Sngi Ba-Ar kala pyntip ba ka la don ka jingtyrwa ban pyntreikam noh ïa ka Meghalaya Journalist Welfare Scheme (MJWS) 2024.
Ka Myntri ka la pyntip ïa kane haba jubab ïa ka jingkylli bala wanrah da u MLA ka BJP na South Shillong, u Bah Sanbor Shullai, ha ka kynta kylli jingkylli ha Ïingdorbar, ha kaba u la dawa ba donkam ban kyntiew noh ïa ka Journalist Welfare Fund da 100% namar kaei kaba ïoh jingïarap da ki nongthoh khubor ka long kaba rit.
Halor kane, ka Myntri kala kubur ba ka Journalist Welfare Scheme 2009 ka dei kaba la rim haba ïanujor bad kiwei ki Jylla, kiba la nang pynkhreh bun shah haba ïadei bad ki lad ai jingïarap ïa ki nongthoh khubor.
Shuh shuh ka Myntri ka la pyntip ba ka tnat ka la nang pynkhreh mynta ban tyrwa ïa ka Meghalaya Journalist Scheme 2024, bad pyntip ruh ba ha kane ka skhim thymmai, ka Sorkar kala tyrwa ban pynkiew ïa ka Journalist Welfare Fund sha ka T.35 lak haba shim ba ka T.5 lak (corpus fund) ka dei kaba rit palat.
“Ka dei kaba kiew haduh 500%, lada jia ba don ka jingïap ki nongthoh khubor. Katba ka song pisa na ka bynta ban sumar lada pang kan kiew na ka T. 50,000 sha ka T.3 lak,” la ong ka Kong Ampareen.
Ka Myntri ka la ong ba halor kane, kum ka sorkar ka pynshlur ïa ki nongthoh khubor ba kin pynrung kyrteng ïalade ha ka Meghalaya Health Insurance Scheme (MHIS) bad pyntip ruh ba la tyrwa ruh ïa ki lad jingsumar ba khlem siew pisa ïa ki nongthoh khubor hynrei kine baroh ki don, dei tang ha ka jingtyrwa.
Halor ka jingkylli bynrap u MLA ha kaba ïadei bad ka baibam tymmen, ka Myntri kala pyntip ba kane ka kam ruh ka dang don hapdeng ka jingpynkhreh.
Haba pynpaw ïa ka jingsngewkhia halor ka jingïoh duna jingsiew jong ki nongthoh khubor, ka la ong ba ki nongthoh khubor ki dei kiba la thungkam da ki riew shimet bad kumta halor kane, ka sorkar kala shim ïa ka sienjam ban pynthikna ba ki nongthoh khubor kiba kamai duna ïa ka T.15,000 kin shah kdup hapoh ka Provident Fund Scheme.
Kumjuh ruh na ka liang u MLA ka UDP na Nongpoh uba la buh ka jingkylli bynrap u la ong hato ka don ne em ka jingsiew ‘Stipend’ na ka liang ka Sorkar ïa ki nongthoh khubor, ha kaba ka jubab na ka Myntri ka long ba ïa ki nongthoh khubor la thungkam da ki riew shimet.
