The Hague, Nailar:
U nongbishar jong ka Netherlands ha ka Sngi Nyngkong u la hukum ia kawei ka kynthei ban sangeh noh ia ka jingpynphriang khubor lamler ba ka kynhun jong ki nongleh beijot ia ki khynnah kiba mane ksuid, ka la treikam ha kawei ka shnong kaba rit, ha kaba ka ïingbishar ha kane ka kynti ka la maham tyngeh ia katei ka briew ba ka lah ban shah pynngat ha ki kyndon pynkheiñ aiñ lada ka dang iai pynphriang ia ki khubor bym shisha bad ka lah ruh ban shah daiñ kuna lada kam sangeh noh shi syndon.
Ki nongmudui ha Bodegraven-Reeuwijk ha ka thaiñ sepngi jong ka Netherlands ki la rah ïa katei ka briew sha ka ïing bishar hadien ba ka la kyntait ban sangeh ban pynphriang ïa ki jingtip ‘online’ halor ki khubor bym don nongrim kiba la pynjynjar ïa katei ka shnong naduh u snem 2021.
Namar la ong ba katei ka briew kam shym sngap ia ka jingmaham jong ki bor pynïaid shnong bad kumta ruh ka la nang pynpur ia katei ka khubor lamler halor ka jingdon jong kitei ki nongmane ksuid ha katei ka shnong, ba ka la kynnoh ba kitei ki nongmane ksuid ki dei ruh ki nongleh be-ijot ia ki khynnah kynthei ha katei ka shnong bad kumjuh ruh ha ki thaiñ ba marjan.
U nongbishar u la khang ban pynmih shuh shuh ïa ki jingthoh online bad u la hukum ïa ka kynthei ban weng noh ïa baroh ki jingkynthoh ba ka la dep pyllait baroh tang hapoh jong kine ki 48 kynta bad lada kam kohnguh lane ka dang iai bteng ia katei ka jingpynphriang khubor lamler, kan shah daiñ kuna haduh 5,000 Euro ($5,600) ha man ka por ba ka pyllait ia kiei- kiei jingkren ne jingthoh ki bym shisha.
