Nongpoh, Nailar 27
Ka Ri Bhoi Peoples’ Council (RBPC) Seng-kmie ha ka Sngi Ba-ar ka la leit ban ïakynduh ïa u Deputy Commissioner ka Ri Bhoi District ban ïakren halor ki jingeh kiba ïadei bad ka Ri Bhoi District kiba kynthup ïa ka jingkieng Lailad, ka Nongpoh Town Shopping Com-plex bad ka jingbym pat siew dep ïa ka bai kali jong ki nongñiah kali kamai ha ka por jong ka jinglynshop ka khlam Covid-19.
Ha kane ka sngi, na ka liang ka seng hapoh ka jingïalam u Bah Jayson Lennox Nongrum, ka la ai ruh da ka jingthoh sha u DC, u Abhilash Baranwal, halor kitei ki lai tylli ki mat kiba kum ka seng ka pynpaw ïa ka jingdonkam ba ki bor ba dei ki hap ban shimkhia mardor ban leh eiei na ka bynta ka jingbha bad ka jingmyntoi jong ki paidbah.
Ha kaba ïadei bad ka jingkieng Lailad, ka seng ka la ong ba katei ka jingkieng ka dei kaba lah ban ïaid tang ki kali kiba hapoh ka jingkhia kaba 9 Metric Ton katkum ka jingpynmih hukum na ka shlem u Executive Engineer ka PWD Roads Nongpoh Division. Hynrei kumba la sakhi na ka por sha ka por, ka la don ka jingïaid jong ki kali kiba khia palat ka 20-30 Metric Ton bad kane ka la buh jingma shikatdei ïa ki paid nongleit nongwan lyngba katei ka jingkieng kaba pynïasoh ïa ka Nongpoh bad ka thaiñ Western Ri Bhoi.
Sa kawei pat ka mat ka dei halor ka jingbym pat lah ban siew dep ïa ka bai kali jong ki nongñiah kali kamai kiba la shah pyndonkam naduh ka por ba wan lynshop ka khlam Covid-19, kaba dang sah palat T.26 lak kaba la buh jingeh shikatdei ïa ki trai kali, khamtam kito kiba shu shim da ka ram ka shah.
Ka mat kaba lai ka dei halor ka jinglong jingman jong ka Nongpoh Town Shopping Complex kaba ka kylla long kum ka ïingjah bad bun tylli na ki kamra kiba don ha katei ka jaka, la shu ieh khongreng bad satah da ki jaboh jabaiñ suda khamtam ha ki bynta jong jaka pynïeng kali bad kylla long ruh kum kawei na ki ktem jong ki kam sniew kiba har rukom.
Ka jingbym biang jong ka um, ka bording ilektrik khamtam ka jingbym don ruh ka generator ha ka por ba lip ka bording ilektrik, ka jingjaw um ha ka por slap bad kiwei kiwei ki jingduna, ki dei ki mat kiba ka seng ka la pynpaw hakhmat u DC.
Halor kitei ki mat, ka seng ka la kyrpad ïa u DC ba un shimkhia bad ban leh ïa kaba donkam mardor, kata, ban khanglad ïa ka jingïoh ïaid laitlan ki kali kiba kit khia na ka jingkieng Lailad bad ban siew dep noh ïa ka pisa jong ki kali kiba pyndonkam ha ka por jong ka khlam Covid-19.
Ha kaba ïadei bad ka Nongpoh Town Shopping Complex, ka seng ka la kyntu ïa u DC ban pynlong ïa ka jingjurip halor ka jingpyndonkam ïa ki kamra, ban pynthymmai ïa ki kyndon ban aiwai sha ki paidbah, ban pynkhuid pynsuba ïa katei ka jaka, ban pyndait ïa ki kor ringdur (CCTV) bad ruh ban buh da ka kynhun kaba thikna ban peit ïa ka jingkhuid jingsuba jong katei ka jaka.
