Shillong, Nailar 27
U Symbud Myntri Rangbah ka Jylla, u Bah Prestone Tynsong, u la ong ba kam don shuh satia kano kano ka lad ka lynti hapoh ka aiñ ban pyllait ïa kano kano ka jingtih marpoh khyndew juk hyndai na ki kyndon ka Meghalaya Minor Minerals Concession Rules (MMMCR),2016 lane ka Mines and Minerals (Development and Regulation) (MMDR) Act, 1957.
U Bah Prestone u la pyntip ïa kane haba jubab ïa ka ‘Zero Hour Notice’ kaba la wanrah da u MLA ka BJP na South Shillong u Bah Sanbor Shullai ha Ïingdorbar ha ka Sngi Ba-ar.
U Bah Prestone ula ong ba ki hukum ka ïingbishar kila teh ïa ka Sorkar Jylla bad ka Sorkar ka la pyntreikam ïa ka Meghalaya Minerals (Prevention of Illegal Mining, Transportation and Storage) Rules 2022, ha kaba ka donkam ïa ka Transport Challan ïa ka jingkhaïi ïa u shyiap, u maw katkum ka Form-H jong ka MMMCR, 2016 kaba la buh kyndon ba ki maw ki dei ban mih na ki Quarry ne ki par kiba don ïa ki Legal Mining Lease lane Quarry Permit.
U Symbud Myntri Rangbah u la ong, kane ruh ka dei ka jingsngewkhia ba ka jingpynkheiñ ïa kine ki Rule kan mut ba la pynkheiñ ïa ka MMDR Act, 1957 kaba long ka jingleh be-aiñ katkum ka kyndon 21 jong ka MMDR Act, 1957.
Ha kajuh ka por, u Bah Prestone u la kular ban sa shim ïa baroh ki sien jam ha kaban pynkloi noh ïa ka jingai ‘Mining Lease’ lane ‘Quarry Permit sha ki nongpan kiba la buh ïa ki kot ki sla bad ka tnat.
U Bah Prestone u la pyntip ruh ba yn sa bthah ïa ki nongtrei ka tnat ba kin ïarap ïa ki briew ha kaban pyndap ïa ki kot ki sla kiba donkam bad ban batai ruh ïa ki lynti ba dei ban leh ha kaban pan ïa ki ‘permit’.
Ha kajuh ka por, u la ong ba ka sorkar kan sa thaw ki lad ki lynti ban pynsuk ïa kiba pan License bad wat ban thaw bad pyntreikam da ka Single Window Agency.
Hashwa kane, u Bah Sanbor u la ong ka jingkhang tih maw tih shyiap kaba rit ka la ktah ïa ki briew kiba im jakpoh na kane ka kam bad wat ïa ki trai kali kamai.
U Bah Sanbor u la ai jingmut ïa ka sorkar jylla ba kan pynkylla bad pynthymmai noh ïa ka Meghalaya Minor Minerals Concession Rules 2016, ban ai jingbit ïa kiba trei rit ban ïoh Permit bad ruh ba ka sorkar kan ithuh ïa baroh kito kiba trei rit ba kin nang ïaid shakhmat ïa ka kam tad haduh ban da la pynthymmai ïa ki kyndon.
