Khliehriat, Nailar 28
U Kñi jong u (L) samla Kynjaimon Amse uba la khlad na ka jingjia takhuh kali kaba la jia ha ka step synñia jong ka 23 tarik Nailar, u la mudui da ka ejahar ha u heh pulit ka thanad Khliehriat ha ka 26 tarik Nailar halor ka jingsuba sniew halor ka jingïap u pyrsa jong u.
Ha ka jingujor u Bah Lalan S Amse, uba dei u Kñi jong u samla Kynjaimon, u la ong ba ha ka 23 tarik Nailar, ha ka por kumba 2 baje mynstep, u la ïoh pdiang ïa ka ‘phone call’ na uwei u briew ïa uba la tip kyrteng kum u Suni Pdang uba la ïathuh ba u pyrsa jong u, u Kynjaimon Amse, u la ngat ha ka jingjia takhuh kali ha ka shnong Dkhiah, East Jaiñtia Hills. U la ong ruh ba ïa ka kali kaba don ïa u nombor ML11-9405 la ñiah da u Fullmon Nongtdu uba dei na Khliehriat ha ka jingdonlang ryngkat ki arngut kiwei pat kiba kynthup ïa u Raja L Suchen bad u Small Lamin kiba dei na ka shnong Huroi katba ki dang wan na Ladrymbai.
“Ha kane ka jingjia, u pyrsa jong nga, u (L) Kynjaimon Amse, u la khlad hashen, hynrei ngam sngew lah ngeit ba ka jingïap ka jong u ka dei na ka daw jong ka jingtakhuh kalina ka daw ba ka don kaei kaei kaba pynsuba namar ka jinglong jingman jong ka kali sha ka liang kaba u shong kam don dak julor khyndiat ruh, bad ka jingjulor ka long tang malu mala,” la ong u Bah Lalan.
Kumta na ka liang u Bah Lalan u kyrpad ïa ki pulit ban pynrung ïa katei ka jingujor bad ban pynlong ïa ka jingtohkit kaba bniah khnang ban lap ïa ki jingshisha baroh.
Lah ban pynkynmaw ba u samla Kynjaimon Amse uba dei u nongtrei mon sngewbha bad nongïasaid aiñ uba ju kit ïa ka khia ka shon jong ki paidbah u la khlad kyndit ha ka jingjia takhuh kali kaba la jia ha ka step phyrngab jong ka 23 tarik Nailar ha ka shnong Dkhiah.
Lah ruh ban kdew ba dang shen, shwa ban jia kane ka ka jingjia kaba sngewsih, u Bah Kynjaimon u la ujor sha ka JHADC halor ka jingai No Objection Certificate ïa ka M/s Meghatop Cement Private Limited kaba don ha ka shnong Wahïajer Elaka Narpuh ban seng ïa ka karkhana dewbilat ha Elaka khlem ka jingmynjur na ka Dorbar Elaka Narpuh bad u la byrthen ruh ban mudui ïa ka JHADC sha ïingbishar lada ym pyndam noh ïa ka NOC kane ka kompani.
Ha ka sngi ba u sdang ïa ka kam ïasaid aiñ ha u snem 2017, u samla Kynjaimon u la pynpaw ïa ka sur na ka bynta ki paidbah kiba sah ha Huroi, Hingaria bad kiwei kiwei ki shnong ha shilynter ka khappud Indo-Bangladesh namarba ym don ka jingpynïasoh surok, jaka sumar, Mobile Phone Tower bad kiwei. U samla Kynjaimon u la mudui da ka PIL ïa ka Sorkar India bad ïa ka National Highways Authority of India sha Meghalaya High Court namar ka jinglong jingman ka surok kaba sniew tasam kaba dap da ki thliew ki syar bad ki jingkieng ba synjor na Lumshnong sha Ratacherra kaba hap hapoh ka National Highway 6 ha shilynter jong ka East Jaiñtia Hills.
