Shillong, Nailar 28
U MLA ka UDP na Mawkyrwat, Bah Renikton Lyngdoh Tongkhar ha ka Sngi Balang u la ai jingmut ïa u Myntri Rangbah ka Jylla, u Conrad K. Sangma ban wanrah noh da ka skhim CMAY ka ban ïasyriem kum ka PMAY (Pradhan Mantri Awas Yojana) jong ka Sorkar Pdeng khnang ban kdup ïa ki baroh ki shnong kiba la shah ieh noh bad ki bym ïoh ïa ki kam pynroi na ka Sorkar.
U MLA u la ong ïa katei haba wanrah ïa ka ‘Call Attention’ hapoh ïingdorbar halor ka khubor kaba la mih ha ‘U Nongsaiñ Hima’ – “13 snem kynthih khlem ïoh khaw rashon & 23 snem khlem ïoh skhim pynroi”.
“Ka long kaba sngewsih ba watla ka Sorkar India bad Sorkar Jylla…ka jingthmu ka long ba man la ka longïing, man la ka shnong, ban ïoh pdiang ïa ki jingmyntoi kiba ka Sorkar India bad Meghalaya ki don jingthmu khamtam sha kiba duna ka ïoh ka kot, hynrei ki don ki daw ba katto-katne ki shnong ki la shah ieh noh,” la ong u Bah Tongkhar.
Haba kdew ïa kawei na ki shnong hapoh konstitwensi jong u, u la ong ba ka shnong Domtynrong ha ryngkat 50 tylli ki longïing, ha kine ki 13 snem ba la dep, kam shym la ïoh khaw rashon (haduh mynta) bad haba u la pyrshang tuklar ïa katei ka kam, kam shym la urlong naba ka don ka jingeh kaba lah ban dei namar ka jinglum jingkheiñ ha ka por ba leh ïa ka khana samari ha u snem 2011.
U la ong ruh bad sa kawei ka shnong – Mawthawiang Nongtwah, kaba la ithuh kum ka shnong ba pura la 23 snem mynta, hynrei kam shym la ïoh ïa kino-kino ki kam pynroi na ka Sorkar khamtam kum ka PMAY kumba ïoh bynta lem kiwei ki shnong nongkyndong.
Haba kdew ba ka MGNREGA kam treikam ha kane ka shnong, u MLA u la ïathuh ba u Rangbah Shnong (jong kane ka shnong) u la ong ba ki shu ïoh bylla da kaba pynrung kyrteng ha kawei pat ka shnong ba marjan.
Haba ban jur ïa ki tnad ba dei khmih ban shimkhia na bynta ban pynbeit ïa katei ka jingeh, u la ong, “Nga don ka jingtyrwa…sngewsih ba u Myntri Rangbah um don lang hangne hynrei nga la kren hi sha u halor kane. Lada u Myntri Rangbahduh ka ri u lah ban don ïa ka PMAY na bynta ka ri baroh kawei, hato u Myntri Rangbah jong ngi ban kdup ïa baroh ki shnong kiba la shah ieh noh…bad don ïa ka CMAY na bynta kito ki shnong kiba la shah ieh noh bad ki bym ïoh ïa ka roi ka par na ka Sorkar khamtam na ki ‘Flagship Programme’.” Haba ban biang ba u buh ïa katei ka jingtyrwa hakhmat u Myntri Rangbah, u Bah Tongkhar u la ong ba 90% na ki nongshong shnong ha kitei ki shnong ki long kiba duna ka ïoh ka kot bad ki donkam ïa ki ïing kiba ka Sorkar India ka ai lyngba ka PMAY, hynrei sngewsih ba kine ki shnong kim ïoh.
“Nga kyrpad ruh ïa ka C&RD bad ka Civil Supply ban shimkhia lem ïa kine ha ka ban wad ki lad ki lynti ban pynbeit noh mynta ïa kine ki jingeh bad peit ba ki shnong ki bym ïoh rashon ki ïoh rashon bad kito ki bym ïoh kam pynroi kin ïoh ïa ka roi ka par,” u la ong.
Ha ka jubab jong u, u Myntri ka tnad Food & Civil Supplies, Bah Comingone Ymbon u la ong ba ka tnad ka la bteng ban ïakren bad ka Sorkar India ban kyrpad pynïar ïa ka jingtreikam ka NFSA hapoh ka Jylla.
Namar ka jingnang kiew ha ka jingbun briew bad ka jinglong rim jong ka SECC 2011, u la ong ba ka long kaba donkam ïa ka Sorkar India ban pyrkhat khmih bniah ha ka ban pynïar ïa ka jingtreikam ban kdup lang ïa ki jingdonkam ba mynta jong ka Jylla. Katba ka Sorkar India ka la kdew ïa ki jingpynkylla halor katei ka bynta, yn sa pyrkhat hadien jong ka khana samari ban wan, u Myntri u la ong ba ka tnad ka dang wad ki lad ki lynti ban khmih ïa ki jingdonkam ba kyrkieh jong ka shnong ba shah ieh.
Shuh shuh u la bynrap ba ka tnad ka la shim ïa ki sienjam ban pynbeit ïa ki jingbym biang haba ïadei bad ki jingkheiñ bad ban pynbha ïa ki kor teknoliji kiba kyrshan ïa ka NFSA ba kynthup ka jingpynbeit ïa ka jingspel dak, ban weng ïa ki jingpynrung kyrteng ba bakla nalor kiwei-kiwei.
