Jowai, Nailar 28
Ka Lion Sports and Youth Affairs ka la khur ïa ka jingjop, katba ka Shangpung bad Panaliar ki la ïakhaid ha ka lympung ïalehkai 2nd Division Football Tournament-7th Debo Shullai Memorial Trophy ba la pynïaid da ka West Jaiñtia District Sports Association (WJDSA).
Ha kane ka jingïalehkai kaba la long ha madan Kiang Nangbah Stadium, Jowai ha ka sngi Balang, ka Shangpung Moosyiem bad ka Panaliar ki la ïasam mar shi point hadien ba ki la ïakhaid mar 1-1 kol.
Ïa ka kol jong ka Shangpung Moosyiem la thep da u Dao Langbang ha ka minit kaba 50, katba ïa ka kol jong ka Panaliar la thep da u Sam-ha-O Sumer ha ka minit kaba 80.
Ha ka jingïalehkai kaba bud, ka Lion Sports and Youth Affairs ka la pynliem noh ïa ka Lumpariat da 1-0 kol bad ïa kane ka shi kol la thep da u Prosperwell Dhar ha ka minit kaba 17.
Kane ka lympung kan bteng biang ha ka sngi Palei ha kaba ka Lutituber Ïalong kan ïakhun pyrshah ïa ka Rising Sun Mukhla ha ka por 12 baje mynsngi, ka Ïawmulong Nartiang pyrshah ïa ka Shangpung Khliehmuchut ha ka por 2 baje nohphai sngi.
