Shillong, Nailar 28
Ka Mawshbuit Boxing Club (MBC) ha ka sngi Ba-ar ka la pynkup burom ïa ki 11 ngut ki khynnah ïakura jong kane ka klob kiba la ïoh ïa ka lad ban leit shim bynta ha ka rynsan ïakura hapoh ka Jylla bad kumjuh ha ki lympung kiba la long shabar jylla.
Ha katei ka sngi la pynkup ïa ki khynnah kiba la lah ban wanrah takma bad ia kiba khlem lah ban ïoh takma ruh kumjuh, ha kajuh ka por ki la pynkup burom ïa u Bah Larry kharpran ba dei u Technical Director bad ha ka juh ka por kum u Joint Secretary ka Boxing Federation of India, uba la ïoh ban leit kum u nongpeit pyrman (observer) sha ka Olympic kaba dang shu dep long ha Paris.
Ha kane ka jingïalang pynkup burom la wan ban ïa don ryngkat da u MLA Mawryngkneng constituency u Bah Heavingstone Kharpran, nangta ki nongïalam ka MBA, ki dkhot ka MBC, Bah E. R.S Nongdhar, Rangbah shnong Mawshbuit , Bah T . Mylliempdah Secretary Shnong Mawshbuit.
Ki nongïalehkai kiba la shah pynkup burom ha katei ka jingïalang ka kynthup ïa u Leo Ferdinand Nongkhaw uba la ïoh ban khur ïa ka takma ksiar bad ha ka juh ka por ban rah ïa ka khusnam best boxer, nangta sa ka Dahunshisha Kharkongor bad ka Glaricia Phibarica Khriam kiba la ïoh ban khur ïa ka takma ksiar, nangta sa Naphisakmen Sohtrun ba la ïoh ban khur ïa ka takma rupa, u Ethanial K Nongkhlaw bad Clifcensius Lyngdoh ba la khur ïa ka takma rnong.
Ka synjuk ka pynkup burom ïa kiwei ruh ki nongïalehkai kampher wat hadien ba kim shym la lah ban ïoh ban khur ïa ki takma.
