Aizawl, Nailar:
Ki pulit jong ka Mizoram ki la ïoh ban pyllait bad pynphai ïing ïa lai ngut ki ‘thei Mizo, kiba la leit trei ïingbriew bad kiba la sahkut ha Syria da kumba 20 bnai.
U heh pulit u la ong, kine ki lai ngut ki briew ki la mih na Mizoram ha u snem 2022 bad sdang ban ïakynduh ïa ki jingeh ba bun haba ki la poi ha Syria ha u bnai Naiwieng jong utei u snem.
Hadien ka jingtrei shitom da ki pulit jong ka Mizoram bad ki heh ba dei khmih jong ka Indian Embassy la rai ban pynurlong ïa baroh ki jingthmu katkum ka jingbud ïa ki kyndon jong ka aiñ.
Kine ki lai ngut ki la mih ban leit sha Syria ha ka 20 tarik, Nailar bad ki la poisuk-poisaiñ sha ka ri khlem kino kino ki jingeh ha ka sngi Saitjaiñ, la ïathuh ki heh pulit. Arngut na kine ki briew ki dei kiba na Hnahthial distrik, katba kawei pat ka dei na Champhai distrik, u la ong. Kine ki lai ngut ki briew ki dei kiba la leit da ka lynti kaba beaiñ sha Syria lyngba ki kynhun jong ki riewshimet ha u bnai Naiwieng na ka bynta ban pyntrei ïa ki ha ki ïingbriew, u la ong.
Ym slem hadien kane ki la poi ha Syria ha ka 6 tarik, Naiwieng, 2022, kine ki lai ngut naduh kane ka por ki la sdang ban ïakynduh ïa kiba bun ki jingeh na ki trai jong ki ïing ba ki trei, kiba la pynibor ïa ki ha ki ïingbishar ha Syria, la ïathuh u heh pulit.
U Myntri Rangbah jong ka jylla u Lalduhoma bad u Myntri ka tnat ki kam pohïing u K Sapdanga ki la shim khiah ha kaba ïadei bad kane ka mat ha ryngkat ka jingai hukum jong ki la lah ban pyllait ïa kine ki lai ngut na Syria naduh u bnai Jymmang, u la ong.
Ha ka por ba la don ha ka jingpyntreikam, ka sorkar jylla ka la ïoh ban ïakren bad ki heh ka Indian Embassy bad kumjuh bad ki heh ka Syria. Hadien ba la pynbiang ïa ki jigndonkam katkum ka aiñ, ka Indian Embassy ha Damascus ka la ai jaka sah ïa kine ki lai ngut na ka bynta lai taïew bad haba la kut ka por kumba la buh ha ka Visa, ïa kine la ïalam noh sha New Delhi ha ka 20 tarik, Nailar bad nangne sha Aizawl ha ka sngi Saitjaiñ, la ïathuh shuh shuh u heh pulit. Ïa kine baroh yn sa pynpoi sha ki shnong jong ki ha kane ka taïew, u la bynrap.
