Shillong, Nailar 29
U MLA ka Nongkrem u Bah Ardent M Basaïawmoit u la pynpaw ïaka jingbitar halor ka jingbym ailad ban ïakren ïa ka mat kaba ïadei bad ka jingkiew dor jong ki marbam hapoh ka jylla, kaba la ktah shikatdei eh ïa ki briew ba wan na ki longïing baduk.
Haba kren sha ki lad pathai khubor, u Bah Ardent u la ong, “Nga la kwah ban rah bad ïakren ïa ka mat jong ka jingkiew dor ki marbam hapoh ka Ïingdorbar, hynrei ym shym la ailad bad ha kaba u Myntri khlem da ïakren bad ïoh pynsngew, u la shu ai ka jubab ba la buh ha ka miej jong ki MLA.”
“Ha ka jingshisha ïa kane ka mat nga la buh kum ka mat ïatai ha ka Zero Hour, hynrei na ka liang u Lamphang u la pynrung jubor ha ka Call Attention bad ym shym la ailad ban ïakren hynrei la bthah ïa u Myntri ban ai ka jubab ha ka miej,” la ong u Bah Ardent bad bynrap, “Nga la kyrpad ïa u Lamphang ba lada ym lah ban don ar tylli ki Zero Hour ha ka shi sngi, dei ban pynrung noh ha kawei pat ka sngi.”
U Bah Ardent u la ong, kane ka mat jong ka jingkiew dor ki marbam ka long kaba donkam bha namar ka ktah lut ïa baroh, bad kwah ban pyntip hapoh ka Ïingdorbar ïa ka jingïapher jong ki dor ki mur jong ki marbam, ki jhur ki jhep haba ïanujor hapdeng ka Assam, Meghalaya bad Mizoram.
Une u MLA ka Nongkrem u la ong ba katkum ka dor kaba la ïoh lum na Ïewduh ha ka 24 tarik mynta u bnai, la lap ba ki dor jong ki jhur bad kiwei ki marbam ki kham rem ha Ïewduh ban ïa ki dor ha Assam bad Mizoram.
U la ong ba ka jingkiew dor jong ki marbam bad ki jhur ki jhep ka la ktah shibun ym tang ïa kito kiba wan na ki longïing kiba duk ba raitoi hynrei wat ïa kito kiba kham biang ka jingïoh namar kim ïoh pynlang pisa shuh.
Ka jingkwah ban rah ïa kane ka mat ïakren kaba kongsan bha ka long ba kwah ban tip ka la leh aiu bad ba ka dei ban tuklar bad wad ïa ki daw. “Ngi kwah ban tip aiu ka sorkar ka la leh halor ka jingkiew dor ki jhur ki jhep, kane ka dei ka dor Ïewduh, te pyrkhat ka dor ha ki ïew bad dukan shnong kan long kumno,” u la ong.
